Қасиетті Рамазан айында 88 жасқа қараған шағында Манаш Қозыбаев атындағы СҚУ көрнекті ғалымы, профессор, ұлағатты ұстаз Әмина Сыздыққызы Жолболсынова дүниеден өтті.
Әмина Сыздыққызы бүкіл саналы ғұмырын коллоидтық химияны зерттеу мен дамытуға арнады. 1958 жылы А.А. Жданов атындағы Ленинград мемлекеттік университетінің химия факультетін, кейін М.В. Ломоносов атындағы Мәскеу мемлекеттік университетінің химия факультетінде аспирантураны бітірді.
Ә.Жолболсынованы ғылыми-зерттеу жұмыстарын жүргізуге профессордың үнемі жылы лебізбен есіне алған ұстаздары тартты: аса көрнекті кеңес физик-химигі, КСРО Ғылым академиясының академигі, Социалистік Еңбек Ері Петр Александрович Ребиндер және кеңес математигі, М.В. Ломоносов атындағы Мәскеу мемлекеттік университетінің ректоры, КСРО Ғылым академиясының академигі, екі Сталиндік сыйлықтың лауреаты Иван Георгиевич Петровский.Әмина Сыздыққызы 1992 жылы Мәскеуде «Модификациялаушы қоспалардың көмегімен желатин, казеин және поливинил спиртінің сулы ерітінділерінің құрылымы мен реологиялық қасиеттері» атты докторлық диссертациясын қорғап, химия ғылымының профессоры ғылыми атағын алды.
Академик Ребиндер ашқан коллоидтық химия мектебінің бағытын дамыта отырып, Әмина Сыздыққызы берілген қасиеттері бар материалдарды, соның ішінде био- және синтетикалық полимерлердің аралас гельдерін алудың ғылыми негіздерін әзірледі; жоғары молекулалық қосылыстардың сулы ерітінділерінде кеңістіктік құрылымдардың пайда болуын зерттеді; жасанды тамақ өнімдері мен дәрілік препараттарды өндіру технологиясын дамытуға қажетті гибридті жүйелерді жасады.
Манаш Қозыбаев атындағы Солтүстік Қазақстан университетінде Әмина Сыздыққызы 60 жылдан астам еңбек етті.Қызмет жолында оның еңбегі республикалық деңгейде жоғары бағаланып, 1987 жылы еңбек ардагері медалімен марапатталды. Одан кейін «ҚР ғылымын дамытуға сіңірген еңбегі үшін» төсбелгісі (2017 ж.), «Солтүстік Қазақстан мемлекеттік университетінің дамуына қосқан үлесі үшін» медалі (2012 ж.), «ҚР білім беру ісінің Құрметті қызметкері» төсбелгісі (2002) және т.б. көптеген марапаттарға ие болды.
Әмина Сыздыққызы талай шәкірттерге ғылым әлемін ашты, оның жетекшілігімен химия ғылымдарының кандидаты ғылыми дәрежесін алу үшін 6 ізденуші диссертация қорғап, еліміздің түкпір-түкпірінде жемісті еңбек етуде. Оның Қазақстан ғылымына қосқан үлесі орасан зор. Оның 350-ден астам еңбектері, 3 авторлық куәлік пен 26 патент, 6 алдын ала патент, 30-ға жуық оқу-әдістемелік құралдары жарық көрді.
Ғалымның жиені, Ресей журналистер Одағының Мүшесі, продюсер, жазушы, тележүргізуші Юлия Федоровна Шамаль, Әмина Сыздыққызын:
«Ғылыми қызметте жанқияр, күнделікті өмірде қайсарлы жан еді. Туыстары, әріптестері мен студенттері оның батыл, қажымас, қызметіне адал, айналасындағы адамдарға жомарт мінезін ұмытпайды»,- деп еске алады.
М.Қозыбаев атындағы СҚУ Басқарма Төрағасы – Ректордың м.а. Апергенова Рената Сейітқызы Әмина Сыздыққызының отбасы мен жақындарына көңіл айтады:
«Әмина Сыздыққызының туған-туыстары мен жақындарына университет атынан және жеке өз атымнан қайғыларына ортақтасып көңіл айтамын. Ол университетіміздің тарихында және жадында мәңгі есте қалады».