Қозыбаев университетінің ұжымы құрметті профессор, Жарасбай Сүлейменовты 75 жылдығымен құттықтады! Оны елге танытқан- еңбекқорлығы мен білімге деген құштарлығы. Халқы оны зерттеуші, журналист, жазушы, қоғам қайраткері ретінде таниды. Ол қарапайым еңбеккерден бастап, Мәжіліс депутаттығының мандатына дейін ие болды.
Солтүстік Қазақстан облысы, қазіргі Шал ақын ауданына қарасты Балуан ауылында туған Жарасбай Сүлейменов республикаға танымал тұлға. Шығармашылық еңбек жолын СҚО «Ленин туы» газетінде кіші әдеби қызметкер болып бастаған. Кейін осы газетте тілші, бөлім меңгерушісі, редакция алқасының мүшесі міндетін атқарды. Бүгінде жұмыс өтілі 50 жылдан асады. 2014-2023 жылдары СҚО әкімдігінің «Қызылжар-Ақпарат» ЖШС бас редакторы, директоры болды. Бас қосуда профессорды мерейтоймен журналистика тізгінін қатар ұстап жүрген замандастары, әріптестері, ізбасарлары құттықтады.
Солтүстік Қазақстан мемлекеттік архивінің директоры Сәуле Мәлікова жазушының қызмет жолына тоқталды: «Жарасбай аға қоғамдық қызметімен көрініп жүрген қаламгер. Өз шығармашылығымен, ел үшін аянбай тер төкті. Ерекше атап өтсем, еңбек жолында ҚР Парламенті Мәжілісінің депутаты лауазымында үлкен мәселені көтеріп, Қызылжар қаласының атауына ұсыныс жасады. Бұл ерлігіңіз ұмытылмайды».
Жарасбай Қабдоллаұлы Екінші дәрежелі «Достық», «Құрмет» ордендерімен,бірнеше медальмен марапатталған. СҚО құрметті азаматы, Қазақстан Журналистер одағы сыйлығының лауреаты, СҚУ құрметті профессоры атағына ие. Бүгінгі мерейтойында оны М. Қозыбаев төсбелгісімен марапаттады.
Сізге зор денсаулық, ұзақ өмір және амандық тілейміз!
