Kozybayev University-ге Satbayev University ректоры Мейрам Бегентаев бастаған делегация келді. Қонақтар кампустың материалдық-техникалық базасымен танысты. Жаңа ғимараттың гео-сканерлеу, инженерия, 3D-принтинг, агрономия және мал шаруашылығы зертханаларын, сондай-ақ, студенттер үшін салынып жатқан 1200 орындық екі жатақхананы аралады. Түлектерге диплом табыстау рәсіміне де қатысты. Сапардың басты нәтижесі: екі ЖОО арасындағы ынтымақтастық туралы меморандумға қол қойылды.
«Екі университет арасындағы мұндай ынтымақтастықты аймақтың болашағына инвестиция ретінде қарастыруға болады. Өңірді барынша дамыту жауапкершілігі сіздің мойныңызда. Өз кезегінде,сізге қолдау көрсетуге және техникалық мамандықтар бойынша магистратура мен докторантураға жеке жеңілдікті гранттар беруге уәде бердім. Белгілі бір кезеңде жоғалған гидрогеология, геология, кенші, ауыл шаруашылығынан бастап, кез келген қажетті бағыттарға қолдау көрсетеміз. Яғни, сол салаларды қазір қалпына келтіруге мүмкіндік бар. Сіздің өңіріңіз бен қалаңыз Аризона Университетінің мүмкіндіктеріне үміт артып отыр. Сондықтан жаңа серпіліс жасау үшін үлкен әлеует бар»,- деді Мейрам Бегентаев.
Кездесуге басқарма ұжымы, декандар мен ғалымдар қатысты. Олар бірлескен диссертациялық кеңестер құру туралы ұсыныс жасады.
«Satbayev University -еліміздің бас техникалық жоғары оқу орны. Бізде бірлескен идеялар көп. Менің ойымша,меморандумға қол қойып, нақты әрекеттерді жүзеге асыратын боламыз», – деп атап өтті Kozybayev University Басқарма Төрағасы-Ректор Ербол Исакаев.
