Өзін ғылымға арнаған профессор, Владилен Поляков мерейтойын атап өтті. Қозыбаев университетінде оны әріптестері мен замандастары құттықтауға жиналды. Басқарма мүшесі Рашит Белгібаев туған күн иесіне СҚО әкімінің құттықтауын табыс етті. Мерейтой иесін салтанатты жиында құшақ гүлдер, сый-сияпат ,жылы лебіз,тілектермен құттықтады.
«Мерейтойыңызбен құттықтауымызды қабыл алыңыз! Сізге зор денсаулық тілейміз! Көптеген қызықты идеяларыңыз бен жоғары жетістіктеріңіз көп болсын. Ал дарынды білім алушылар қатары арта берсін және ғылыми мектебіңіз одан әрі дамысын», - деп құттықтады Басқарма мүшесі Рашит Белгібаев.
Владилен Поляков 40 жылдан астам уақыт бойы Қозыбаев университетінің ғылыми әлеуетінің дамуына зор үлес қосып келеді. Ол бальзам терегіне негізделген биологиялық белсенді препараттарды жасау бойынша ғылыми мектептің негізін қалаушы болды. Студенттерімен бірге онкологиялық аурулармен және туберкулезбен күрес саласында зерттеулер жүргізді.
Владилен Поляков «Тополин» және «Эфматол» препараттарын алды, олар ісікке қарсы, жараларды емдейтін және микробқа қарсы препараттар ретінде клиникалық сынақтардан сәтті өтті. Алматы, Қарағанды, Астана және Петропавл қалаларының медициналық мекемелерінде енгізілді.
«Біз терек печеньесін жасадық. Сәулелік терапиядан өткен науқастар терек бальзамының бүршіктерінен бөлінген пайдалы заттармен байытылған печенье қабылдады. Нәтижесінде олардың қандағы негізгі көрсеткіштері қалыпқа келді»,- деді профессор.
Владилен Васильевич жұмыс істеген жылдары медициналық практикаға СҚО өсімдіктері негізінде 8 фитопрепарат енгізілді. Сондай- ақ, «Поляков сығындысы»- ауыл шаруашылығы үшін жаңа отандық өсу стимуляторы енгізілді.
Владилен Васильевич С.Киров атындағы Қазақ мемлекеттік университетін бітірген.Владилен Поляков біздің университетте 1980 жылдан бері жұмыс істейді. 2000 жылы Қарағанды органикалық химия және көмір химиясы институтында докторлық диссертациясын қорғады. Еңбек жолы оқытушыдан ғылыми жұмыс жөніндегі проректорға дейін өтті. Владилен Васильевичке ұзақ өмір және амандық тілейміз!
