Қазақстандық ЖОО-ға шетелдік ғалымдарды тарту жөніндегі ҒЖБ министірлігінің жобасы шеңберінде Қозыбаев университетіне 4 аптаға Түркиядан PhD доктор, ғалым Джелаль Чекен келді.
«Бізде 2 жылдан бері Аризона университетімен қос диплом жобалары жүзеге асырылуда. Сіз IT бағытында оқып жатқан студенттермен кездесесіз. ИСТ факультетінде ғылыми жобалар жазуға қатысуды ұсынғым келеді. Менің ойымша, бұл нәтижелі серіктестіктің жақсы бастамасы болмақ»,- деді Басқарма Төрағасы-Ректор Ербол Исақаев.
Джелаль Чекен Түркияның Коджаэли және Сакария университеттерінің, АҚШ-тың Оңтүстік Флорида университетінде жұмыс істеді. Қазіргі уақытта сымсыз сенсорлық желілерді, интернет деректерін талдауды және қауіпсіз бағдарламалық жасақтаманы әзірлеумен айналысады. Айтып өткен жөн, Түркиядан келген ғалым бір ай бойы БАЖ мамандығының қос диплом бағдарламасының студенттеріне сабақ береді. Ол ПОҚ үшін біліктілікті арттыру курсын, ғылыми семинар өткізу, IT мамандығы бойынша халықаралық студенттерге дәріс оқып, оқытушыларымызбен бірлесіп ғылыми мақалалар дайындайды.
