Қос дипломдық бағдарламасының 1 курс студенттеріне брендтік сыйлықтар табыс етудің дәстүрлі рәсімі өтті. Биыл мұнда 82 білім алушы оқуға түсті.Аризона университетінің өкілдері жаңа студенттерін қарсы алды. Вице-президент Дженни Лидің айтуынша, олардың университеттерінде қос дипломдық бағдарламалардың студенттері оқитын 17 шағын кампус бар. Енді солтүстікқазақстандық білім алушылар осы үлкен қауымдастықтың бір бөлшегіне айналды.
«Біздің университетіміздің бойтұмары– жабайы мысықтар(Wildcats) Вильбур мен Вильма. Сондықтан қауымдастығымыздың атауы- Wildcat family. Бүгін жаңа студенттерімізді қарсы алуға қуаныштымыз! Болашақта қоғамға үлкен үлес қосып, биік шыңдарды бағындырасыздар деп сенеміз! Сіздер әлемді жақсы жаққа өзгерте аласыздар!»,- деді Дженни Ли.
Сонымен қатар, студенттерді Басқарма Төрағасы –Ректор Ербол Исақаев құттықтап, сәттілік тіледі.Келесі кезекте студенттерге ақпараттық жүйелер, биотехнология және білім берудегі инклюзия қос дипломдық бағдарламалардың үш бағыты бойынша оқыту жүргізетін кураторлары таныстырылды.Шараның соңында білім алушылардың жүздерінен қуаныш сезімі байқалды. Олар бірден «Аризона университеті» деген жазуы бар бас киімдерін киіп көрді. Ең бастысы барлық емтихандарды сәтті тапсырып, Қозыбай университеті мен Аризона университетінің қос дипломдық бағдарламаларының студенттері атанды! Сәттілік, достар!
