Петропавлда ҚР Ғылым және жоғары білім министрі Саясат Нұрбектің, Солтүстік Қазақстан облысының әкімі Ғауез Нұрмұхамбетовтің және Қозыбаев университетінің стратегиялық серіктесі болған Аризона университеті делегациясының қатысуымен заманауи Студенттер үйінің ашылу салтанаты өтті.
«Аризона университеті– табысты серіктестіктің алғашқы үлгісі. Ең алдымен Петропавлда академиялық хаб құру міндеті тұрды. Ал бүгінде қос дипломдық бағдарламалар, Қазақстанның түкпір-түкпірінен және шетелдерден жастарды тартады. Алдағы 4-5 жыл ішінде Қозыбаев университеті халықаралық стандарттарға көшеді. Екінші міндет – Қозыбаев университетін халықаралық зерттеу университетіне айналдыру. Бұл университет үлкен академиялық шеберлік орталықтары бағдарламасына таңдалды. Енді жыл сайын Қозыбаев университеті ғылыми-зерттеу әлеуетін жабдықтау және арттыру, профессорларды шақыру және кадрларды қайта даярлау үшін қосымша қаржы алатын болады. Аризона университеті АҚШ Ауыл шаруашылығы министрлігінің үлкен серіктесі болып табылады. Солтүстік Қазақстан облысының әкімдігі бұл әлеуетті бірден іске асырды. Ал енді Қозыбаев университеті еліміздің бүкіл солтүстік өңірі бойынша қуатты агротехникалық ғылыми-зерттеу орталығына айналуы үшін министрлік тарапынан толыққанды қолдау көрсетіледі»,– дейді Саясат Нұрбек.
Аризона университетімен ынтымақтастықтың арқасында бірлескен білім беру бағдарламалары сәтті жүзеге асырылады. Мұнда 1000-нан астам студент білім алуда. Студенттер үшін 156 орындық жаңа жатақхана іске қосылды. Сондай-ақ, ғимаратта халықаралық бағдарлама студенттеріне сабақ беретін профессорлар үшін қосымша 25 пәтер бар. Барлық бөлмелер заманауи жиһаздармен және жаңа техникамен жабдықталған.Жақында 1200 орындық тағы бір Студенттер үйін ашу жоспарлануда. Осылайша, Қозыбаев университеті студенттерінің 100 пайызы жатақханамен қамтамасыз етіледі.
