ҚР ғылым және жоғары білім министрі Саясат Нұрбек пен Аризона университеті өкілдерінің қос дипломдық бағдарламалар студенттері үшін жаңа оқу жылының ашылу салтанатына қатысуы игі дәстүрге айналды. Биыл біз бірлескен бағдарламалар бойынша үшінші студенттер тобын қарсы алдық. ҚР ҒЖБМ жоғары ілтипаты студенттерді ерекше қуантты. Саясат Нұрбек білім алушыларға Қазақстандағы ғылымды дамыту стратегиясы, Coursera курстары, академиялық адалдық, жүздеген жаңа мүмкіндіктер ашатын ауқымды ғылыми және академиялық жобалар туралы айтып берді. Жаңа білім алуға ынталандыратын кітаптарды ұсынып, шетелде оқу туралы жеке тәжірибесінен алған кеңестерімен бөлісті.
«Сіздерге сабақ беріп, тәжірибелерімен бөлісу үшін АҚШ-тан профессорлар келді. Олардан барынша білім алып, көкжиектеріңізді кеңейтіңіздер, жаңа жобаларға қатысыңыздар! Министрлік өз кезегінде сіздерді қолдап, көмек көрсетеді»,- деді ҒЖБ министрі.
Кездесу барысында студенттер ҚР жоғары оқу орындарының шетелдік филиалдары, онлайн оқыту, болашақ мұғалімдерге инклюзивті білім беру үлгісін құру және т.б тақырыпта өз сауалдарын қойды Биотехнология мамандығы бойынша қос диплом бағдарламасының үшінші курс студенті Әмір Ағзамов жазғы демалыста Сингапур Ұлттық университетінде «NUS Amgen Scholars Program 2024» тағылымдамадан өтуге мүмкіндік алғанын айтты. Бұл тәжірибе оны ғылыми зерттеулер жүргізуге шабыттандырады.
