Аризона штаты (АҚШ) делегациясының Солтүстік Қазақстан облысына сапары аясында қонақтар Қозыбаев университетінде болды. Олар оқу-зертханалық ғимаратының ғылыми-зерттеу жабдықтарымен танысты, сонымен қатар, студенттер мен оқытушыларға арналған 156 және 1200 орындық жаңа жатақханаларды аралады. СҚО әкімінің орынбасары Жүсіп Жұмағұлов және ЖОО басшылығымен кездесу өтті.
«Аризона университеті Қозыбаев университетінің стратегиялық серіктесі болып табылады. Бүгінгі таңда 1000-ға жуық студент бірлескен білім беру бағдарламалары бойынша білім алуда. Сонымен қатар, біз ғылыми салада ынтымақтастық құрамыз. Өткен аптада Аризона университетінің делегациясымен біздің облысымыз, еліміздің агроөнеркәсіп кешенінің тиімділігін арттыратын бірлескен ғылыми зерттеулер үшін 500 гектар жер бөледі деп келістік. Үшжақты меморандум аясында жобаға қытайлық әріптестерді де тартамыз. Бұл жұмыстың нәтижесі АӨК арттыруда өз жемісін береді деп сенеміз», - деді Жүсіп Жұмағұлов.
Американдық делегация өкілдері Аризона штатының серіктестік бағдарламасына тоқталып, ғылым мен бизнес, мәдени алмасу саласындағы бірлескен жобаларды жүзеге асыруға қызығушылық танытты.
Аризона штаты губернаторы Кеңсесінің федералды істер бөлімінің директоры Билли Ковакс сапардың мақсаты СҚО және ЖОО-мен танысу екенін атап өтті. Серіктестікті нығайтуға ықпал ететін бағыттарға тоқталды: сауда, білім беру, мәдени байланыс саласындағы қатынастар және т.б. Кездесуге қатысушылар естелік сыйлықтармен алмасып, өзара тиімді ынтымақтастықты жалғастыруға ниеттерін білдірді.
