Басқарма Төрағасы – Ректор Ербол Исақаев қонақтарды Аризона университетімен ынтымақтастық жобасымен таныстырды. Бұл шетелдік жоғары оқу орнымен стратегиялық әріптестік бойынша еліміздегі алғашқы табысты жоба. Бүгінде Қазақстанның барлық аймақтарынан және шетелдерден 1000-ға жуық білім алушы 16 қос дипломдық және халықаралық бағдарлама бойынша оқиды. Ынтымақтастықтың келесі кезеңі – аймақтың агроөнеркәсіптік кешенін дамытуға бағытталған ғылыми зерттеулер болмақ.
«АҚШ Ауыл шаруашылығы министрлігі мен Аризона университетінің ғалымдарының қолдауымен біз суару технологиясы мен су ресурстары бойынша бірлескен гранттық зерттеу жобасына кірістік. Аризона университетімен, Қытайдың Солтүстік-Батыс ауыл шаруашылығы және орман шаруашылығы университетімен суды зерттеу мәселелері бойынша үш жақты келісім жасалды. Бұл жұмыстардың барлығы университеттің халықаралық тұрақтылығын нығайтуға және білім беру бағдарламаларының сапасын арттыруға ықпал етеді. Басты мақсат – ЖОО-ны халықаралық стандарттарға сай зерттеу университетіне айналдыру», – деді Ербол Исақаев.
Дэниел Розенблюм Аризона университетімен ынтымақтастық жобасына қолдау білдірді. Сондай-ақ, АҚШ Елшілігі университеттермен серіктестік бағдарламасы аясында Қозыбаев университетінің ғылыми жобаларына гранттық көмек көрсетуге дайын. Серіктестіктің тағы бір саласы – Фулбрайттың «Ағылшын тілін оқыту жөніндегі көмекшісі» (ETA) бағдарламасы. Бұл бағдарлама бойынша университетке Джесси Дромски-Рид келді. Осы оқу жылы ішінде ол білім алушыларға сабақ өткізетін болады.
Келесі кезекте қос дипломдық бағдарлама бойынша оқып жатқан студенттермен кездесу өтті. Айтып өткен жөн, келесі жылы студенттердің алғашқы тобы Тусон қ. Аризона университетінің негізгі кампусына оқуға аттанады. Студенттерді виза алу, құжаттарды рәсімдеу, басқа елге бейімделу мәселелері қызықтырды. АҚШ Елшісі оларға жан-жақты қолдау көрсетуге ниет білдірді.
