Жастар арасындағы есірткі қылмысының алдын алу мәселесін СҚО ПД өкілдері мен ЖОО талқылады. Полиция қызметкерлері құқық бұзған азаматтың заңсыз жеңіл ақша табу және есірткінің заңсыз айналымына қатысты кез келген әрекеті үшін қылмыстық жауапкершілікке тартылатынын тәжірибеден мысалдар келтіре отырып жеткізді. Сондай-ақ студенттерге осы тақырыпта бейнероликтер көрсетілді. Өкінішке орай, бүгінде синтетикалық есірткінің дүние жүзінде таралуы қарқын алуда. Бұл заңсыз әрекетке қатысқандардың көп бөлігі жастар.
«Жыл басынан бері СҚО ПД 193 есірткі қылмысын анықтады. Заңсыз айналымнан 150 келіден астам есірткі заттары тәркіленді. Қылмыстық жауапкершілікке 78 адам тартылды. Біздің талдауымызша, олардың жартысынан көбі 16-25 жас аралығындағы жастар. Есірткі саудасымен айналысатын адамдардың жасы өзгерді. Егер бұрын бұл қылмыстарды бірнеше рет сотталған 25 пен 40 жас аралығындағы тұлғалар жасаса, қазір әртүрлі әлеуметтік топтағы жастар ақша табудың оңай жолын іздеп жүр», – деді СҚО ПД бастығының орынбасары полковник Асқар Мұхаметқалиев.
Есірткі қылмысын азайтудың басты міндеті оның алдын алу жұмыстары. Сондықтан мұндай дәріс кездесулер студенттерге есірткіні таратудың салдары туралы егжей-тегжейлі ақпарат беруге арналған.
