Университет қабырғасында ҚР қаржылық мониторинг агенттігінің СҚО бойынша экономикалық тергеп-тексеру департаменті және «SHYŃ» интеллектуалды пікірсайыс клубы бірлесе отырып, «Бұрынғы қаржылық пирамидалар XXI ғасыр пирамидаларына қарағанда қауіптірек» тақырыбында дебат ойынын өткізді. Пікірсайысқа 4 команда қатысып, білім алушылар БПФ форматында қазіргі таңдағы өзекті тақырыптардың біріне айналған- қаржылық пирамидалар жөнінде төрт жақты ашушы үкімет, ашушы оппозиция, жабушы үкімет, жабушы оппозиция бағытында тартысты ойын көрсетті.
Ойын барысында СҚО бойынша Экономикалық тергеу департаменті басқармасының басшысы Виктория Алпеева қаржылық пирамидалармен күресу жолдарымен бөлісіп, интернет алаяқтарының құрығына түспеудің алдын алу бойынша түсіндірме жұмыстарын жүргізді.
«Біз жастармен кездесулерді жиі өткіземіз.СҚО бойынша Экономикалық тергеп-тексеру департаменті қаржы пирамидаларының қызметін анықтау және алдын алу бойынша тұрақты негізде жұмыс жүргізеді. Бүгінгі күні алдын алу іс-шараларының тұтас кешені әзірленді, бұл құқыққа қайшы 1 100-ден астам сілтемені, оның ішінде 115-і азаматтарды қаржы пирамидаларының қызметіне тарту бойынша, 414-і ойын бизнесі белгілері бар интернет-ресурстар, 625-і электрондық казино жарнамасы бойынша сілтемелерді бұғаттауға мүмкіндік берді. Қаржы пирамидаларының белгілері бар материалдарды бұғаттау үшін Ақпарат және қоғамдық даму министрлігіне жіберіледі», – деді Виктория Алпеева.
Нәтижесінде 1 орынды «Екі Мавроди» фракциясы иеленді. Қатысушылар мен жеңімпаздар арнайы сертификаттар және сыйлықтармен марапатталды.
