Заманауи студенттер үйінің ашылуы Қозыбаев университеті үшін ғана емес, бүкіл Солтүстік Қазақстан облысы үшін жарқын оқиға. Бір-бірімен байланысқан 11 қабатты екі тұрғын үй. Ауданы – 27 мың ш.м. Бұл ҚР-да ашылып жатқан ең ірі студенттік жатақхана. Ол 1200 орынға арналған. Жайлы жиһаздары бар бөлмелер, асхана, медициналық пункт, жаттығу залдары, коворкинг-аймақтар – мұның барлығы студенттердің ыңғайы үшін жасалған.
«Мемлекет Басшысы Қасым-Жомарт Тоқаевтың тапсырмасы бойынша СҚО-да жатақханалардағы орын тапшылығын азайту бойынша жұмыстар жүргізіледі. Қыркүйек айында біз Театральная көшесіндегі 156 орындық ЖОО студенттері мен шетелдік оқытушылар үшін жаңа жатақхананы аштық. Бүгін біз 1 200 орындық жатақхананы ашамыз. Мұнда тұруға, демалуға, бос уақытты тиімді өткізуге және сабаққа дайындалуға барлық жағдай жасалған. Осылайша Президенттің тапсырмасын орындадық және Қозыбаев университетінің студенттері үшін жатақханалардағы орын тапшылығын 100%- ға жаптық», – деп түйіндеді СҚО әкімі Гауез Нұрмұхаметов.
Нысанның құрылысы 2022 жылы басталды. Жобаны «Основание» ЖШС жүзеге асырды.
«Бұл нысанды СҚО-ның әлеуметтік-экономикалық даму жоспары аясында жергілікті атқарушы органдар салған. Қозыбаев университетінде 6 мыңға жуық студент оқиды, қазір контингентті 9 мыңға дейін ұлғайту жоспарымыз бар. Өз кезегінде студенттерге басқа өңірлерден келіп жайлы орналасуға мүмкіндік береді», – деді Басқарма Төрағасы – Ректор Ербол Исақаев.
Студенттер үйі негізгі кампустан небәрі 500 метр қашықтықта орналасқан. Бұл білім алушылар үшін де жайлы болмақ.
«Еліміздегі жоғары білім саласында Қозыбаев университетінің алатын орны ерекше. Араларыңызда оңтүстіктен, еліміздің түкпір-түкпірінен арман қуып келген студенттер бар. Олардың әлеуметтік жағдайын жақсарту үшін жаңа жатақхана ашылды. Сондықтан ең бастысы тек қана білім алыңыздар. Еліміздің келешегі сіздердің қолдарыңызда. Қоныс құтты болсын», – деп атап өтті Ақерке Абылайхан ҚР ҒЖБМ жоғары және жоғары оқу орнынан кейінгі білім комитеті төрағасының орынбасары.
Өңір басшылығы ЖОО студенттерімен де кездесті. Солардың бірі Айдана Омарова Аризона университетімен қос диплом бағдарламасына оқуға түсті. Бойжеткен елордадан келіп Петропавл қаласының ЖОО таңдап отыр: «Еліміздің басқа университеттеріне түсуге мүмкіндігім болды, бірақ мен Қозыбаев университеті мен Аризона университетінің ынтымақтастық жобасына тоқталдым. Бүгінде жаңа оқу зертханалық корпус пен студенттер үшін салынған жатақхана үшін алғыс айтқым келеді». Жаңа Студенттер үйінен басқа Қозыбаев университетінде 1 365 орындық тағы 4 жатақхана жұмыс істейді.
