Көкшетау мектептерінің үздік түлектерін Қозыбаев университеті мен Аризона университетінің қос дипломды бағдарламаларына тарту Назарбаев Зияткерлік мектебінен басталды. Барлығы 11-12 сыныптардың 70-ке жуық оқушысы КББ жұмыстарымен қамтылды. Олар биотехнология, ақпараттық жүйелер және білім берудегі инклюзия бағыттары бойынша қос дипломды білім беру бағдарламалары туралы ақпарат алды.
Қозыбаев университетінің Жобалық кеңсесінің өңірлік менеджері Қайрат Сапаров қатысушыларға қазақстандық және американдық 2 диплом алу мүмкіндігі жайлы айтты. Бұл ретте оқыту гранттар бойынша толығымен ағылшын тілінде жүргізіледі. Келесі жылы біздің білім алушылар Тусон қаласындағы (АҚШ) Аризона университетінің негізгі кампусына семестр бойы оқуға барады. Мұндай білім беру саяхаты олар үшін тегін.
Сонымен қатар, ЖОО өкілдері Қозыбаев университетінің жатақханаларына түсу мүмкіндіктері, студенттердің оқу жағдайлары туралы таныстырды. Балалар жоғары білім алу перспективаларына қызығушылық танытып, QR-код бойынша өз деректерін қалдырды. Ендігі оларға құжаттарды тапсыру және рәсімдеу, мамандық таңдау және т. б. мәселелерде көмек көрсетіледі.