Қозыбаев университетінің студенттері Герольд Бельгерді еске алды. Герольд Карлович Бельгер- белгілі жазушы, аудармашы, публицист, әдебиеттанушы, қоғам қайраткері. 53 кітаптың авторы, 220-дан астам шығарманы орыс және қазақ тілдеріне аударған. Оның шығармашылық және қоғамдық еңбегі көптеген марапаттарға ие болды: Президенттің бейбітшілік және рухани келісім сыйлығы, «Парасат» ордені.
Жеті жасынан бастап қазақ ауылында өскен, қазақ мектебін бітірген. Үш тілде еркін сөйледі. Оны елдің тағдыры, оның ішіндегі этностар мен мәдениеттердің өзара қарым-қатынасы толғандырды. Жазушының еңбектері екінші дүниежүзілік соғыс және ҚР Тәуелсіздігі кезеңдерін қамтиды. Қаламгердің шығармашылығына тоқталған бірлестік өкілдері жиналғандарға Г.Бельгердің өмірі туралы кеңінен мәлімет берді. Студенттер жазушының өмірімен танысты, оның шығармаларынан үзінділер оқыды. Әдеби шараға Солтүстік Қазақстан облыстық Қазақстан халқы Ассамблеясының этномәдени бірлестіктерінің өкілдері қатысты.
«Бүгін біз Герольд Бельгердің өмірі мен шығармашылығын еске алдық. Оның әдеби мұрасы кітаптарында, аудармаларында мәңгілік сақталып қалады. Герольд Бельгерді үш мәдениеттің өкілі деп айтуға болады. Ұлты неміс болса да, жүрегі қазақ деп соққан жазушы еді», - деп қорытындылады кеш жүргізушілері.
