ЖОО-ға Эстония Республикасының Қазақстандағы Төтенше және Өкілетті Елшісі Яап Ора келді. Ол Қозыбаев университетінің басшылығымен кездесіп, студенттерге ашық дәріс өткізді. Яап Ора студенттерге Эстонияның тарихы, мәдениеті, сондай-ақ, Орталық Азияның елдері маңызды орын алатын сыртқы саясатының бағыттары туралы айтып берді.
«Тәуелсіздікті сақтап, басқа тәуелсіз мемлекеттермен және халықаралық ұйымдармен ынтымақтастықта ғана дамуға болады. Біз Қазақстанмен халықаралық құқықтың үстемдігі қағидатын бөлісеміз және одан әрі ынтымақтастыққа дайынбыз», – деп атап өтті Эстонияның ҚР Елшісі.
Қозыбаев университетінің Басқарма Төрағасы – Ректоры Ербол Исақаев өз кезегінде Эстония Республикасының жоғары оқу орындарымен байланыс орнатуға, мәдени алмасуды жүзеге асыруға, бірлескен зерттеу және академиялық жобаларды іске асыруға дайын екендігін білдірді: «Біз үшін Эстония университеттерімен бірлескен білім беру бағдарламаларын, академиялық ұтқырлықты, ғылыми қызметті дамыту саласындағы өзара қарым-қатынас орнату өте маңызды. Сіздің қолдауыңызбен Эстонияның ғалымдарымен, педагогтарымен және IT-орталықтарымен жақсы байланыс орнатамыз деп үміттенеміз».
