Жыл сайын университеттің дайындық бөлімінің базасында құрылған «Foundation» факультеті қандас азаматтарын студенттер қатарына қабылдайды. Биыл Қозыбаев университетінде тыңдаушылар үшін ауқымды мерекелік Таныс like кеші ұйымдастырылды.
Мерекеге облыстық қоғам белсенділері, мекеме басшылары, кәсіпкерлер, университет құрамының басшылары, факультет түлектері, студенттер қатысты. Тыңдаушыларды университетіміздің «Foundation» оқытушылары құрамы құшақ жайып, қарсы алды. Шара еркін форматта білім алушылардың дайындаған концерттік бағдарламасын қамтыды.
«Студенттер қатарына қабылдау кешінде кездескеніме қуаныштымын. Бүгін сахнада өнер көрсетіп, шығармашылық дайындықтарыңыз үшін алғыс айтамын. Ұлты қазақ шетел азаматтары, еліміздің құрамдас бөлігі. Олардың тарихи және этникалық отаны – Қазақстан. Университетімізде 9 ай бойы дайындалып, грант иегерлері атанады деп сенемін. Сәттілік тілеймін », – деп Басқарма Төрағасы – Ректор Ербол Исақаев құттықтады.
Қазіргі таңда факультетте Моңғолия, Қытай, Өзбекстан, Иран, Ауғанстаннан 75 қазақ ұлтының азаматтары білім алуда. ЖОО оқытушылар құрамы шетелдегі қандастарымызды университетпен таныстырып, өнерлеріне қолдау білдіріп, жаңа ортаға бейімдеу үшін университетішілік, қалалық, облыстық мәдени-спорттық іс-шараларға тартады.
