Көрнекті ғалым, экономика ғылымдарының кандидаты университеттің қалыптасуында елеулі із қалдырған тұлғалардың бірі -Қанаш Шәкенов. 18 жыл К.Д.Ушинский ат. Петропавл педагогикалық институтын басқарды. Қанаш Шәкенұлы университеттің қарқынды дамуына өлшеусіз үлес қосты: инфрақұрылым жақсарып, оқу корпустары, үш жатақхана, № 1 спорт залы, қызметкерлерге арналған тұрғын үйлер салынып, оқытушылар құрамының жүйелілігі артты. Көшбасшы еңбекке, оқытушыларға, студенттерге деген зор сүйіспеншілігімен ерекшеленді.
Қ.Ш.Шәкеновті еске алуға арналған волейболдан турнир осымен екінші жыл Қозыбаев университетінің оқытушылары мен қызметкерлері арасында өткізіледі.Бұл жолы үш күн бойы 8 факультет, әскери кафедра және әкімшілік-басқару құрамы жеңіс үшін күресті. Жарыстың жүлде қоры 300 мың теңгені құрады.
Турнир қонақтары спорт ардагерлері, ғалымның әріптестері, достары мен туыстары, өз естеліктерімен бөлісіп, Қанаш Шәкенұлының оқу ордамыздың дамуына қосқан зор үлесін атап өтті. Дәстүр бойынша «алтынға» басты үміткер педагогикалық факультетінің командасы болды. Негізі жартылай финалдық ойын тартысты өтті. Дегенмен, ПФ волейболшылары финалда жеңіске жетті. Екінші орын әскери кафедраға бұйырды. Үшінші орынға ӘБҚ командасы жайғасты. Барлық жеңімпаздар марапатталып, ақшалай сыйлықтарға ие болды. Құттықтаймыз!
