Бүгінгі таңда университетімізде оқытушылар мен студенттерге арналған семинар-тренингтер өткізіп, бірлескен ғылыми жобалар мен халықаралық журналдарға мақалалар дайындайтын 4 шетелдік профессор мен магистрант бар. Олар ҚР ҒЖБМ Қазақстандағы жоғары оқу орындарына шетелдік мамандарды тарту бағдарламасы аясында Қытайдан, Түркиядан, Польшадан келді.
Басқарма Төрағасы– Ректор Ербол Исақаев ғалымдармен кездесу өткізді. Қозыбаев университеті мен еліміздің солтүстік өңірі үшін ынтымақтастықтың маңыздылығына тоқталды.
«Сіздерді университет қабырғасында қарсы алуға қуаныштымын! Мұндай академиялық ұтқырлықтың негізгі мақсаты – академиялық және ғылыми біліммен алмасу. Сіздің сапарыңыз университетіміздің қызметіне оң өзгерістер әкеледі деп сенеміз. Дәстүр бойынша біз, білім ордамызға келетін қонақтармен әріптестікті жалғастырамыз: мақалалар мен ғылыми жобаларды жүзеге асырамыз»,- деді ректор.
Бұл бағытта қазірдің өзінде біршама нәтижелер бар. Орталық Азиядағы ауыл шаруашылығының экономикасы туралы қытайлық әріптестермен бірлесіп ғылыми мақала жазылуда. Ынтымақтастықтың тағы бір бағыты– Түркия ғалымдарымен ғылыми жобаға Еуропалық Одақтан гранттық қаржыландыруға өтінім беру. Барлық жоспарларыңыздың сәтті орындалуына тілектеспіз!
