ҒЖБМ кеңесшісі Руслан Емелбаев СҚО-ға сапары барысында Қозыбаев университетінің ғылыми зертханаларын, студенттерге арналған 1200 орындық жаңа жатақханаларын аралады. Министрдің кеңесшісі Қабылдау және іріктеу басқармасының мамандарымен бірге қаламыздағы Әбу Досмұхамбетов атындағы облыстық дарынды балаларға мамандандырылған гимназия-интернатының жоғары сынып оқушыларымен кәсіптік бағдар беру кеңесін өткізді. Қазіргі кезде мектеп бітіруші түлектер арасында кәсіби бағдар беру мәселесі өте өзекті.
«Бүгінде ҒЖБМ жасап жатқан шаралардың бірі- шетелдік филиалдардың ашылуы. Жақсы мүмкіндіктердің бірі қос дипломлдық бағдарламалар бойынша оқу. Президентіміз өзінің жолдауында әсіресе талапкерлердің саналы түрде өздерінің мамандықтарын таңдау керек деп ерекше атап өтті. Өкінішке қарай қазақстандық талапкерлердің бірінші кезекте мамандық таңдауда, алдарына қоятын негізгі мақсаттарының бірі-грант. Бұл саладағы талай майталман мамандардың айтуынша, талапкерлер мамандық таңдауда алдымен грантқа көңіл бөледі, мамандықты екінші орынға қояды. Менің ойымша негізінен ата-ананың ықпалы мен пікірлері маңызды»,-деді Руслан Емелбаев.
Қозыбаев университеті республикада бірінші болып Аризона университетімен қос дипломдық бағдарламаларды жүзеге асыру бойынша ынтымақтастық жобасын іске қосты. Бүгінгі таңда олар 3 бағыт бойынша жүзеге асырылады: биотехнология, ақпараттық жүйелер, білім берудегі инклюзия. Кездесуде мектеп оқушыларына жоғары білім саласында болып жатқан өзгерістер, мамандықты дұрыс таңдау, Қозыбаев университетінің Аризона университетімен оқу шарттары жайлы толыққанды ақпарат берілді. Талапкерлер өз елінде грант арқылы сапалы шетелдік білім алу мүмкіндігін жоғары бағалады. Қонақтар, мектеп оқушыларының көкейлерінде жүрген сұрақтарға жауап берді.
