Университет өкілдері өңірдегі бірқатар өндірістік кәсіпорындарды аралап, Ахмет Байтұрсынұлы атындағы университеттің инфрақұрылымымен танысты. Сапардың басты бағыты– машина жасау саласы мамандарын даярлау аясындағы өзара қарым-қатынас және студенттерді дуальды оқыту мүмкіндігі.
Басқарма Төрағасы– Ректор Ербол Исақаев бастаған делегация құрамы «СарыарқаАвтоПром» ЖШС, «KIA QAZAQSTAN» ЖШС, «KamLitKZ» ЖШС қызметімен танысты.Компания басшылығымен СҚО колледждерінің студенттері мен түлектерін инженерлік мамандықтар бойынша дуальды оқыту перспективалары талқыланды. Қозыбаев университетінің Үздіксіз білім беру институтында өндірістік тәжірибеден өту, студенттер мен ПОҚ өндірістік тәжірибеден өткізу, кәсіпорын қызметкерлерінің біліктілігін арттыру курстары қарастырылды. Бұл бастамалардың барлығы біздің университет пен Қостанай облысының үш ірі кәсіпорны арасында қол қойылған екіжақты меморандумдардың арқасында жүзеге асуы мүмкін.
Сапар барысында біздің топ Ахмет Байтұрсынұлы атындағы Қостанай өңірлік университетіндегі қолданбалы биотехнология ҒЗИ, Smart -орталық, ауыл шаруашылығы ғылымдары мен машина жасау, энергетика және ақпараттық технологиялар факультеттерімен танысты. Кездесуде машина жасау мамандығына кадрлар даярлау, жұмыс берушілермен өзара әрекеттесу, түлектерді жұмысқа орналастыру, ғылыми-зерттеу бастамаларына қолдау көрсету, кәсіпорындарда тағылымдамадан өту, академиялық ұтқырлық, сондай-ақ, тәжірибе алмасу мәселелері көтерілді.
