«XXI ғасыр көшбасшысы» зияткерлік ойынының жеңімпазы ПФ халықаралық бағдарламасының студенті Расул Қаршалов (ПВО-24 тобы) атанды. Бұл жарыс қаламызда жыл сайын колледждер мен университеттердің мүмкіндігі шектеулі студенттері арасында өткізіледі. Шараны «АМАНАТ» партиясы «Болашақ» филиалы мен «Ардос-Жүрек» қоғамдық бірлестігі «Кедергісіз келешек» жобасы аясында ұйымдастырады.
Биыл ойынға 10 адам қатысты. Зияткерлік сайыс үш кезеңнен құралды. Алғашқы «Байға» кезеңінде ең жылдам жауаптар бағаланды. Келесі кезекте оқушыларға жазбалардың артына жасырылған сұрақтар қойылды. Соңғы кезеңде ойыншыларға бес сұрақтан тұратын төрт тақырып ұсынылды.
«Біз барлығына тең мүмкіндіктер жасауға ұмтыламыз. Жыл сайын жаңа форматтағы сұрақтарды енгізу арқылы зияткерлік ойындарды одан да қызықты етуге тырысамыз»,- деп атап өтті «АМАНАТ» партиясы «Болашақ» филиалының жауапты хатшысы Александр Зель.
Жеңімпаздар мен қатысушылар дипломдармен және естелік сыйлықтармен марапатталды. Студенттер білімдерін сынап қана қоймай, аз уақыт ішінде топпен жұмыс жасауды үйренуге бейімделді.
Фотосуреттерді Amanat партиясының баспасөз қызметі ұсынды
