Университетімізде оқушылар мен студенттер арасында «Hurricane Startup Challenge 2025» өңірлік Startup жобалар байқауының алғашқы іріктеу күні басталды. Конкурсқа шешім іздеуден, әлемді жақсы жаққа өзгертуден қорықпайтын жас инноваторлар жиналды. Оған 16 мен 22 жас аралығындағы облысымыздың жоғары оқу орындарының, мектептері мен колледждерінің блім алушылары қатысады. Байқау қаржылық сауаттылық пен кәсіпкерлікті дәріптеу, бизнес саласындағы білім алушылардың шығармашылық әлеуетін ашу,дарынды студент жастарды анықтау мақсатында өткізіледі. Жалпы жүлде қоры шамамен 1 миллион теңгені құрайды. Іріктеу турына барлығы 40-қа жуық стартап-жоба ұсынылады. Шараны ұйымдастыруға біздің демеушілеріміз: Raduga ЖШС, Avagro ЖШС, Forte Bank АҚ көмектесті.
Тұсаукесер рәсімінен кейін тәлімгерлер жартылай финалистермен бір апта бойы Workshop форматында жұмыс істейді. Бұл әркімнің қабілетін ашып, инновация саласында алғашқы қадам жасауға бірегей мүмкіндік!
«Бүгінгі іс-шара – қазіргі заманның сын-қатерлеріне батыл шешімдер ұсынатын жас дарындарды, белсенді мектеп оқушылары мен студенттерді қолдаудың маңызды алаңы. Біздің университет бұл байқаудың ұйымдастырушысы ретінде қатысып жатыр. Жастардың кәсіпкерлігін қолдау, инновациялық ойлауын дамыту және стартап мәдениетін қалыптастыру өте маңызды», – деп атап өтті Басқарма Төрағасы – Ректор Ербол Исақаев.
Жобалар жұмысын СҚО «Атамекен» Ұлттық кәсіпкерлер палатасының мамандары мен Қозыбаев университетінің Ғылым департаментінің қызметкерлері кіретін құзыретті қазылар алқасы бағалайды. Іріктеу кезеңінің қорытындысы бойынша тек үздік жобалар жартылай финалға, кейін финалға өтеді. Барлық қатысушыларға сәттілік тілейміз!
