Университет қабырғасында ҚР Конституциясының 30 жылдығына арналған «Ата Заң – тәуелсіздік тірегі» атты ұлттық іс-шаралар жоспары аясында өңірлік жиын өтті.ҚР Конституциялық сот өкілдері оқу ордамыздың ПОҚ және білім алушыларымен кездесу ұйымдастырды. Еліміздің негізгі заңын насихаттауға арналған шара ҚР Конституциялық Сотының, Бас прокуратураның, Парламентаризм институтының және Қазақстан заңгерлер одағының қолдауымен өткізілді.
Қозыбаев университетінің басшысы Ербол Исақаев қонақтарды қарсы алып, шараның маңыздылығына тоқталды: «Заңның арқасында еліміз тұрақты саяси жүйе құрып, әділеттілікке бағдарланған заманауи қоғамды қалыптастыра алды. Әсіресе, бүгінгі шараның ЖОО-да өтіп жатқаны қуантады. Бұл жас азаматтардың заңды Отан алдындағы жауапкершілігін түсінетін орта қалыптастыруға мүмкіндік береді. Сондай-ақ,білім алушыларымыз жоғары деңгейдегі мамандардың пікірін тыңдап, тақырып төңірегінде ой-өрістерін кеңейтті».
Бүгінде Конституция тәуелсіздігіміз бен мемлекеттігіміздің тұғырына айналды. Кездесуде еліміздің құқықтық жүйесінде Конституциямыздың үстемдігі мен оның құндылықтары, саяси тұрақтылықты қамтамасыз ету мәселелері талқыланды. Қатысушылар Конституциялық Соттың тиімді жұмыс істеуінің маңыздылығын атап өтті.
«1995 жылы референдумда мақұлданған еліміздің Негізгі Заңы мемлекеттіліктің берік іргетасына айналды, демократиялық қағидаттарды бекітіп, еліміздің тұрақты дамуына кепілдік берді. ҚР Президенті Қасым-Жомарт Тоқаевтың бастамасымен 2022 жылға арналған конституциялық реформа конституциялық заңдылықты нығайтудағы маңызды кезең болды. Ол саяси жүйедегі маңызды өзгерістерді бекітті және құқықтық мемлекеттің одан әрі даму бағыттарын белгіледі», – деп атап өтті ҚР Конституциялық Сотының судьясы Айгүл Қыдырбаева.
Кейін спикерлер аудиторияның сұрақтарына жауап берді.
