5 маусым- Дүниежүзілік қоршаған ортаны қорғау күні. Экологиялық мерекеге орай ауқымды іс-шара «Таза Қазақстан» жалпыұлттық акциясы аясында, қалалық жастар ресурстық орталығы өкілдерінің қолдауымен өтті. Бұл мерекеге білім ордамыздың жастары мен барлық ерікті азаматтары жиналды. Қозыбаев университетінде волонтерлік эко-ұйымдар жұмыс істейді, ғимараттарда қалдықтарды бөлек жинауға арналған жәшіктер орнатылды, қалашық жыл сайын абаттандырылады. Акцияны университет ұжымы оқу ордамыздың орталық алаңында гимнастикалық жаттығулардан бастады.
Университеттің тарихи мұражайының маңында 25 ағаш көшеттері мен гүлдер отырғызылды. Осылайша студенттер қалашықты көркейтуге өз үлестерін қосты. Сонымен қатар, барлық факультеттер кампус аумағында ПЭТ бөтелкелерін жинау сайысына қатысты. Ең көп жинаған ИСТФ студенттері жеңімпаз атанды.
Эко-квест барысында білім алушылар әртүрлі тапсырмаларды орындай отырып, қоршаған ортаны таза ұстау, табиғатты қорғау шараларын ұсынды. Қатысушылар өз білімдерін, логикалық ойлау қабілеттерін және командалық жұмыс дағдыларын көрсетті. Нәтижесінде, Го-22к тобының студенттері Адия Тұрғынова, Сұңқар Амангелді, Алтынай Серікова, Әйгерім Қапен, Жансая Ғабдуллина жеңімпаз атанды. Жоба тақырыбы: «Климаттың өзгеруіне қарсы күрес:жаһандық шешімдер». Университет 20 жылдан астам табиғатты қорғау саласында мамандар дайындап келеді.
Қазір бізде 158 болашақ эколог білім алады. География және экология кафедрасының меңгерушісі Бану Доскенова атап өткендей, мұндай шаралар студенттердің жауапкершілігін арттырып, тұрмыстық қалдықтарды сұрыптау мәдениетін қалыптастырады. Науқан барысында 30 келіге жуық пластик Raduga ЖШС қайта өңдеуге жіберілді. Қозыбаев университетінің белсенді студенттері тазалық пен тәртіпті сақтауға шақырады.
