Жібек жолы ауылшаруашылық білім беру және ғылыми-технологиялық инновациялар альянсы бұл- тұрақты ауыл шаруашылығы, азық-түлік қауіпсіздігі және жаһандық климаттық сын-қатерлерге бейімделу мәселелерін бірлесіп шешу үшін «Бір белдеу, бір жол» бастамасына қатысушы елдердің аграрлық университеттерін біріктіретін халықаралық платформа болып табылады.
Альянстың жыл сайынғы 10-шы конференциясы 2025 жылдың 6–8 шілдесінде Алматы қаласында өтті. Іс-шараға 10 елдің: Қазақстан, Қытай, Пәкістан, Иордания, Сербия, Беларусь, Ресей, Өзбекстан, Қырғызстан және Тәжікстанның 18 аграрлық университетінен 130-дан астам өкілі қатысты. Форум жоғары оқу орындарын, ғалымдарды, сарапшыларды бір алаңға жинап, ирригация, агротехнологиялар, селекция, азық-түлік қауіпсіздігі, ғылыми инновациялар салаларында тәжірибе алмасып, шешімдер талқыланды.
Қатысушыларды:
Қазақ ұлттық аграрлық университетінің (ҚазҰАУ) басқарма төрағасы – ректоры Күрішбаев А.Қ.
Ву Путэ, Солтүстік-Батыс ауыл және орман шаруашылығы университетінің (ҚХР) ректоры
Цзян Вэй, Алматыдағы ҚХР бас консулы
Айхан Сұлтан, Қазақстан Республикасы Ауыл шаруашылығы министрлігі аграрлық ғылым және білім департаментінің директоры құттықтады.
Барлық баяндамалар халықаралық серіктестікті, бірлескен ғылыми және білім беру платформаларын дамыту, технологиялық алмасуды күшейту және білікті мамандарды дайындау, қолданбалы әзірлемелерді енгізу үшін университет ресурстарын біріктіруге бағытталды. Қозыбаев университеті Петропавл қ. М.Қозыбаев атындағы СҚУ базасында Қазақстан-Қытай ауыл шаруашылығы құзыреті орталығын құру бастамасын ұсынды. Орталық ауыл және су шаруашылығы технологияларын коммерцияландыру, қолданбалы зерттеулер жүргізу, ауыл шаруашылығы өндірісіне әзірлемелерді енгізуді қолдау, сондай-ақ агробизнеспен ынтымақтастықты құру алаңына айналады. Негізгі бағыттардың бірі «Қызылжар» АЭА инфрақұрылымымен өзара байланыс орнату болып табылады. Бұл ЕАЭО және Жібек жолы елдерінің аумағында шешімдерді кеңейту мүмкіндіктерін ашады.
Бастама Қытайдың Солтүстік-Батыс ауыл және орман шаруашылығы университетінің басшылығының қарауына қабылданып, стратегиялық серіктестікті нығайтуға бағытталған өзекті қадам ретінде қызығушылық тудырды.
Конференция аясында Солтүстік Қазақстан университеті мен Беларусь мемлекеттік ауыл шаруашылығы академиясы арасында ынтымақтастық туралы келісімге қол қойылды. Шара қорытындысы бойынша 10 қатысушы Альянстың дамуына қосқан үлесі үшін құрмет грамоталарымен марапатталды.
Марапатталғандар қатарында Агротехнологиялық факультетінің деканы Шаяхметова А.С. бар. Екінші күні ҚазҰАУ-да ауылшаруашылық білімін интернационалдандыру және ауыл шаруашылығын жаңғыртуға арналған сессиялар өтті. Қатысушылар агроөнеркәсіп кешеніне заманауи технологияларды тиімді енгізудің үлгісі – суды үнемдейтін суару зертханасын да аралады.
Мұндай халықаралық іс-шаралар ғылыми және білім беру байланыстарының нығаюына ықпал етеді, ЖОО-ның күш біріктіруіне, инновацияларды бірлесіп әзірлеуге және енгізуге мүмкіндік береді, жаһандық өзгерістер жағдайында аграрлық секторды дамытудың тұрақты негізін құрайды.
