Стратегиялық серіктестікті нығайтамыз. Оқу ордамызға Аризона университетінің Орталық және Оңтүстік Азия мәселелері жөніндегі аға директоры Рики Салазар келді. Ол Қозыбаев университетінің басшылығымен, ғалымдарымен, Халықаралық кампус және ғылым департаментінің қызметкерлерімен бірқатар жұмыс кездесулерін өткізді.
«Бұл менің Петропавлға оныншы сапарым. Қозыбаев университетінің өкілдерімен жүздескеніме өте қуаныштымын. Осыған дейін біз негізінен қос дипломдық бағдарламаларды дамыту туралы, сондай-ақ, академиялық ынтымақтастық жолдарын талқыладық. Енді серіктестерімізбен алға жылжып, бірлескен ғылыми жобалармен жұмыс жасаймыз. ЖОО-ның QS халықаралық рейтингіне ендіңіздер. Сіздерді шын жүректен құттықтаймын. Бұл үлкен жетістік! Біз 30-ға жуық студенттік бағдарламаға келген студенттерді қуана қарсы аламыз! Биылғы жылы Аризона университетінің негізгі кампусы мен АҚШ-та ғылыми тағылымдамадан өтетін ғалымдарды қолдауға дайынбыз»,- деді Рики Салазар.
Айтып өткен жөн, ғылыми әріптестік саласында АҚШ Ауыл шаруашылығы министрлігі қаржыландыратын су сапасын микробиологиялық бағалау бойынша екіжақты жоба жүзеге асырылып жатыр. Агроөнеркәсіп өндірісіндегі тәуекелдерді азайту, суару және сумен жабдықтау қауіпсіздігін арттыру үшін су мониторингі және тазарту технологиялары әзірленеді. Зерттеу тобының құрамына Аризона университетінің профессорлары Charles Gerba (су микробиологиясы бойынша жетекші әлемдік сарапшы) және Irina Panyushkina (климаттық өзгерістер жөніндегі маманы), сонымен қатар Қозыбаев университетінің Агротехнологиялық факультетінің деканы Алтын Шаяхметова кіреді.
Бірқатар жобалар еліміздің аграрлық секторы үшін шешуші рөл атқаратын Солтүстік өңірінің тұрақты дамуы үшін маңызды ғылыми тірегі болмақ. Бұл зерттеулер:
- бидайдың төзімділігін арттыру үшін агрогеномика;
- бәсекеге қабілетті селекцияны дамыту және отандық тұқым шаруашылығын қамтамасыз ету;
- Қазақстанның климаты жағдайында дәнді дақылдарды артық ылғалдан қорғаудың инновациялық шешімдерін іздеу;
- мал шаруашылығының өнімділігі мен тұрақтылығын арттыруға арналған цифрлық шешімдер.
Аризона университетінің ауқымды ғылыми бастамасы полимерлер мен экологиялық таза материалдарды өндіру үшін күкіртті өңдеудің тұрақты технологияларын әзірлеу болды. Қозыбаев университеті ғалымдары үшін бұл жоба- полимерлі материалдар, батареялар, оптика және ауылшаруашылық тыңайтқыштарын өндіру үшін күкіртті кері вулканизациялау бойынша зерттеулерді дамытуға мүмкіндік береді. Су ресурстары орталығының Аризона университетімен және Қытайдың Солтүстік-Батыс ауыл және орман шаруашылығы университетімен жұмысы аясында халықтың денсаулығын қамтамасыз ету үшін Солтүстік Қазақстан облысының су ресурстарына мониторинг жүргізудің, тазартудың және ұтымды пайдаланудың жоғары технологиялық шешімдерін әзірлеу және енгізу жүзеге асырылады.
