Қозыбаев университетінің тарихында алғаш рет түлектерге арналған SAMGAU – 2025 ауқымды шарасы ұйымдастырылды! Петропавл қаласының орталық алаңында студенттерге СҚО әкімі Ғауез Нұрмұхамбетов, сенатор Ольга Перепечина, университет директорлар кеңесінің төрағасы Ғалым Байтук, Аризона университетінің Орталық және Оңтүстік Азия мәселелері жөніндегі аға директоры Рики Салазар, киноактриса Самал Еслямова, Басқарма Төрағасы-Ректор Ербол Исақаев дипломдарын табыстады. Сондай-ақ, университеттің құрметті ардагерлері мен серіктестері қатысты. Түлектер мен кеш қонақтарына ҚР Ғылым және жоғары білім министрі Саясат Нұрбек құттықтау лебізін жеткізді.
«Облыстың зияткерлік орталығына айналған университет Солтүстік Қазақстан облысының дамуына зор үлес қосып келеді. Әсіресе, түлектердің 84% астамы тұрақты жұмысқа орналасқан. Көптеген білім алушылар магистратура мен докторантурада оқуларын жалғастыруда. Бұл университет түлектеріне деген сұраныстың және мамандарды дайындау сапасының жоғары екендігін көрсетеді. Жақында біз әлемдік деңгейдегі ең маңызды оқиғаға куә болдық. Бұл алғаш рет мемлекеттік қолдаудың, халықаралық серіктестікті дамытудың және білім мен ғылыми зерттеулердің сапасына назар аудара отырып, академиялық ұтқырлықтың арқасында мүмкін болды», - деді Солтүстік Қазақстан облысының әкімі Ғауез Нұрмұхамбетов.
Білім алушылар да алғыстарын білдіріп, ізгі тілектерін жеткізді. Қозыбаев университеті оларға берік білім, жаңа тәжірибе, сондай-ақ сенімді достар мен тәлімгерлер сыйлады. Үлкен сахнада оқу ісінің өркендеуіне еңбегімен, талантымен үлес қосқан түлектер – оқу озаттары мен белсенділері марапатталды. Түлектер мен барша қала тұрғындарына нағыз мерекелік көңіл-күй сыйлаған қазақстандық жұлдыздар- IL'HAN, Қанат Ерлан және Q-production шақырылды.
Қозыбаев университетін биыл барлығы 1400-ден астам түлек бітірді. Бакалавриатты 1225 адам бітірсе, оның 303-і үздік дипломмен аяқтады. 50-ге жуық студент Солтүстік Қазақстан облысы, Ақмола облысы, Астана қаласы әкімдерінің және «Қазақстан халқына» қоғамдық қорының гранттары бойынша білім алды. Түлектер арасында Үндістан, Қытай, Моңғолия, Ресей, Грузия, Қырғызстан, Өзбекстаннан келген 99 шетел азаматы бар. Сондай-ақ, 147 магистр және 59 интерн оқуларын бітірді.
Құрметті түлектер! Алда сіздерді жаңа мүмкіндіктер күтеді. Біздің университетіміздің қабырғасында алған білімдеріңіз батыл шешімдер қабылдауда, кәсіби өсу жолында берік негіз болсын. Біз сіздердің жетістіктеріңізді мақтан тұтамыз!Таңдаған жолдарыңыз табысқа апарсын, шабыт пен сәттілік серік болсын! Университет есігі сіздер үшін әрқашан ашық! Ақ жол!
