Пушкин және Абай көшелерінің қиылысында орналасқан Қозыбаев университетінің 2 оқу ғимаратының қабырғасына Ұлы Абай Құнабаевтың суреті бейнеленген мурал салынды.
Абайдың қалдырған мұрасы ғасырлар бойы сақталып қалатын рухани қазына. Муралда ақынымыздың Толық адам тұжырымдамасы мен «Ақыл, қайрат, жүректі бірдей ұста, сонда толық боласың елден ерек. Жеке-жеке біреу жарытпайды, жол да жоқ жарыместі жақсы демек» деген қанатты сөздері жазылған. Толық адам ілімі арқылы Ұлы ойшыл, адам баласына тән негізгі қасиеттердің: қайрат, ақыл, жүрек екенін көрсетеді.
Бұл композиция қала тұрғындарын, соның ішінде жастарды адамгершілікке, адалдыққа тәрбиелейді. Әділеттілік және парасаттылық қағидаларын ұстануға шақырады. Ұлы ақынның суретін де айнымай етіп салған. Оның жан-жағы әсем ою-өрнектермен безендірілген. Сурет эскиздерін біздің «Құрылыс және дизайн» кафедрасының студенттері мен оқытушылары дайындаған. Мурал алыстан көз тартып, қала мен университеттің көркін келтіреді.