Ұлттық статистика бюросының басшысы Қозыбаев университетінде

Қазақстан Республикасы Стратегиялық жоспарлау және реформалар агенттігі Ұлттық статистика бюросының басшысы Мақсат Тұрлыбаев Солтүстік Қазақстан облысына жұмыс сапарымен келді. Сапар нысандарының бірі Қозыбаев университеті болды. Кездесу барысында Басқарма Төрағасы – Ректор Ербол Исақаев университеттің инфрақұрылымымен, оның ішінде 1200 орындық жаңа заманауи жатақханамен, озық құрал-жабдықтармен қамтылған және ғылыми зерттеулерге кең мүмкіндіктер ашатын ғылыми зертханаларды таныстырды. 

Ербол Исақаев университеттің агроөнеркәсіптік кешенге қатысты білім беру бағдарламаларын белсенді түрде дамытып, өңірдегі жетекші ауылшаруашылық кәсіпорындарымен берік серіктестік орнатып жатқанын баса айтты. Бұл ынтымақтастық сұранысқа ие мамандарды дайындауға және ғылыми жобаларды жүзеге асыруға мүмкіндік береді. Мақсат Тұрлыбаевтың айтуынша, елімізде үлкен деректермен жұмыс жасай алатын кадрлар қажет.

«Бүгін біз Қозыбаев университетімен ынтымақтастық туралы меморандумға қол қойдық. Нәтижелі тәжірибе алмасуға және ғылыми жобаларға бірлесіп қатысуға негіз болады деп үміттенеміз. Бізге деректермен жұмыс істеуге дайын студенттер, магистранттар мен докторанттар қажет. Біз өз кезегімізде оларды жұмысқа қабылдап қана қоймай, оқытуға, статистика саласындағы құзыреттерін дамытуға көмектесуге дайынбыз»,- деді ҚР СЖРА Ұлттық статистика бюросының басшысы Мақсат Тұрлыбаев.

Бұл келісім Қозыбаев университетінің студенттері мен оқытушыларына тәжірибеге бағытталған оқыту, тағылымдамадан өту және ғылыми зерттеулер жүргізу тұрғысынан жаңа мүмкіндіктер ашады.