Оңтүстік Кореядан Қозыбаев университетінің магистратурасын таңдайды

Оңтүстік Корея азаматы 42 жастағы О Чон Гиль Петропавлға турист ретінде аймақтың ауылшаруашылық тәжірибесі мен танысу үшін келді. Ол өзінің туған қаласы Хвасонда мал фермасын басқарады. Оның айтуынша, Қозыбаев университетінде оқудың үлкен мүмкіндіктері бар, өйткені ол ауылшаруашылық мамандарын дайындайтын мықты факультет пен ресурстарға ие. Сонымен қатар, университеттің серіктестерімен –СҚО ауылшаруашылық тауар өндірушілерімен тығыз байланыс орнатылды. Студенттер осы кәсіпорындарда өндірістік тәжірибеден өтіп, түлектер жұмысқа орналасады, ғылыми қызметкерлер ауыл шаруашылығы кәсіпорындарына қатысты тақырыптарда бірлескен зерттеулер жүргізеді.

«Болашақта фермерлік кәсіп ашып, Петропавлда ауыл шаруашылығын дамытқым келеді. Мұндағы табиғи орта дәл осы кәсіпке, әсіресе сүт-тауарлы фермаға өте қолайлы. Сондай-ақ қазақстандық студенттермен, фермерлермен және кәсіпкерлермен байланыс желісін құрғым келеді. Сондықтан бұл университетке құжат тапсырып отырмын. Осы аймақта ферманы басқарып, бизнесті жүргізуді үйренгім келеді », - деді О Чон Гиль .

Ол Қозыбаев университетінің «Мал шаруашылығы өнімдерін өндіру технологиясы» мамандығы бойынша магистратураға оқуға түсті. Бағдарлама екі жылға созылады. Осы уақыт ішінде Солтүстік Қазақстандағы бірінші оңтүстіккореялық магистрант тек лекцияға қатысып қана қоймай, сонымен қатар облыстағы ірі мал шаруашылығы фермалары мен өңдеу зауыттарында өндірістік тәжірибеден өтуге мүмкіндік алады.