Бүгінгі технология мен цифрлық қызмет дәуірінде , аға буын өкілдерінің заман ағымына ілесіп, өздерін сенімді сезінуі маңызды. 2025 жылғы 15 қыркүйекте Л.Н. Гумилев атындағы ЕҰУ-де «Eurasian Silver Forum: белсенді ұзақ өмір және білім 50+» форумы өтті. Оның жұмысына ҚР ҒЖБ министрі Саясат Нұрбек пен Үшінші жас халықаралық университеттерінің қауымдастығының (AIUTA) президенті, профессор Франсуа Веллас қатысты.
Қозыбаев университеті мен AIUTA арасындағы ынтымақтастық туралы меморандумға қол қойылды. Министр Саясат Нұрбек бұл әріптестік тәжірибе алмасуға және егде жастағы азаматтарды оқытудың жүйелі тәсілін дамытуға тиімді алаң болатынын баса айтты.
Қазіргі уақытта университетімізде «Күміс университет» жобасында үш топтың тыңдаушылары оқып жатыр:
✔Йога
✔Салауатты дене тәрбиесі
✔Компьютер және цифрлық сауаттылық
Қатысушылар арасында зейнеткерлер, университет қызметкерлері және өзін-өзі дамытуға, денсаулығын жақсартуға және жаңа цифрлық дағдыларды меңгеруге мүдделі қала тұрғындары бар. AIUTA- мен ынтымақтастық Қозыбаев университеті үшін жаңа көкжиектер ашады. Біз күн сайын үздіксіз білім берудің құндылықтарымен бөлісеміз. Бұл курс белсенді, мәдени, академиялық және әлеуметтік өмірді қалыптастыруға көмектеседі.
Алдағы жоспарларымызға бірлескен конференциялар ұйымдастыру, оқу-әдістемелік материалдарды басып шығару, халықаралық гранттарға қатысу, оқытушылар мен сарапшылар алмасу бағдарламалары кіреді. Халықаралық бағдарланған білім беру ортасын құру инклюзивті қоғам құрудағы маңызды қадам екеніне сенімдіміз.
