Қытайдың Солтүстік-Батыс ауыл және орман шаруашылығы университетінің профессоры Zhongliang Jiang университетімізге келді. Ол бір апта бойы Агротехнологиялық факультеттің, академиялық алмасу бағдарламасы бойынша қаламыздағы қытайлық студенттермен кездесіп, факультет үшін семинарлар өткізеді. Сапардың басты мақсаты– ғылыми әріптестік. Профессор «Халық денсаулығын қамтамасыз ету үшін Солтүстік Қазақстан облысында су ресурстарын мониторингілеу, тазарту және ұтымды пайдалану бойынша жоғары технологиялық шешімдерді әзірлеу және енгізу» жобасының зерттеу тобының құрамына кіреді. Бұл сумен жабдықтаудың өзекті мәселелерін шешуге бағытталған ірі мегагрант.
«Университет ұжымымен, сіздерді су ресурстары жөніндегі ірі ғылыми жобамызды жүзеге асыруды талқылау үшін арнайы шақырдық. Білім ордамызға үздіксіз қолдау көрсеткеніңіз үшін алғыс айтамыз. Жақында ҚР ҒЖБ министрі бастаған Қозыбаев университетінің делегациясы Бейжіңде болып қайтты. Қазақстан мен Қытай мемлекет басшыларының қатысуымен өткен форумда бірқатар маңызды бірлескен құжаттарға қол қойылды. «Айцзю» компаниясымен меморандумға отырдық. Оның негізгі мақсаты: бірлескен Қазақстан-Қытай ауыл шаруашылығы құзыреті орталығын құру болып табылады»,- деді Басқарма-Төрағасы Ректор Ербол Исақаев.
Оқу ордамыз 2017 жылдан бері Солтүстік-Батыс ауыл және орман шаруашылығы университетімен ынтымақтасады. Осы уақыт ішінде екі жоғары оқу орны достық қарым-қатынаста серіктестік орнатты.«Біз сіздермен көптен бері жұмыс істеп келеміз. Су ресурстары жобасына қажетті құрал-жабдықтардың тізімін ұсындық. Әрине, бұл өте ауқымды жоба. Сондықтан алдағы уақытта туындаған мәселелер мен қиындықтарды бірлесіп шешеміз деп сенемін»,- деді Zhongliang Jiang.
Қытайдың жетекші аграрлық университетімен стратегиялық серіктестік: облысымыздың бәсекеге қабілеттілігін арттырады, ауыл шаруашылығы өндірісін жаңартады, халықаралық кадрлар даярлау стандарттарын енгізеді, экспорттық әлеуетті дамытады, Солтүстік Қазақстанның агроөнеркәсіптік кешеніне инвестиция тартады. Әріптестерімізге сенім білдіргендері үшін алғыс айтамыз!
