Ашықтық, серіктестік және даму

Қозыбаев университетінің Директорлар кеңесі қазақстандық жоғары оқу орындарының тарихында алғаш рет бизнес өкілдерімен және БАҚ өкілдерімен ашық диалог форматында ақпараттық таңғы ас ұйымдастырды. 2020 жылдан бастап бұл университет үшін ашықтық және жауапкершілік мәдениетін дамытудағы маңызды қадам болды.

Дәл сол кезде Қазақстанның мемлекеттік университеттерінің меншік құрылымы коммерциялық емес акционерлік қоғамдарға ауысып, корпоративтік басқарудың жаңа үлгісі – Директорлар кеңесі енгізілді. Бұл шешімнің негізгі мақсаты өкілеттіктерді және бақылау функцияларын бөлу болып табылады. Жалғыз акционері– ҚР Ғылым және жоғары білім министрлігі, ал құрылтайшысы– ҚР Үкіметі. Бұл университеттің қаржылық тәуелсіз және тұрақты болуына, академиялық еркіндікке ие болуына және халықаралық деңгейде алға жылжуына мүмкіндік берді.

Директорлар кеңесі- стратегияны анықтайтын, мүдделер тепе-теңдігін қамтамасыз ететін және қабылданған шешімдердің тиімділігін қадағалайтын мамандар.

«Корпоративтік басқару жүйесі құрылды: нормативтік құқықтық актілер  әзірленді, жұмыс қағидаттары анықталды, ішкі аудит пен комплаенс іске қосылды. Қазіргі уақытта мұнда Қозыбаев университетінің Директорлар кеңесінің құрамындағы барлық қажетті құзыреттерге ие мамандар жұмыс істейді», - деп атап өтті Директорлар кеңесінің төрағасы Ғалым Байтұқ.

Шарада Директорлар кеңесінің жұмысы, қабылданған шешімдер, соңғы бес жылдағы даму динамикасы, білім беру қызметінің сапасын арттыру, инфрақұрылымды жаңарту, аймаққа қатысты ғылыми зерттеулерді дамыту, қызметкерлердің әл-ауқатын жақсарту, студенттерді қабылдауды арттыру, серіктестікке тарту сияқты мәселелер талқыланды.

«Raduga KDR университетпен ұзақ мерзімді серіктестікке ие. Осы жылы біз менеджмент және өнеркәсіп кафедраларымен жұмыс жасағымыз келеді. Біз қазірдің өзінде студенттік тәжірибені белсенді түрде жүзеге асырып жатырмыз. Болашақ менеджерлер мен экологтар бірінші курстан төртінші курсқа дейін бізде тағылымдамадан өтеді», - деп бөлісті Raduga KDR ЖШС директоры Петр Шарапаев.

Бизнес және БАҚ өкілдерімен тұрақты кездесулер сенімді нығайтуға және жұмысымызды нәтижелі етуге көмектеседі.