Қазақстан Республикасы күні: үздіктерді марапаттау мерекесі

Сөздәйектер галереясы

“Ұстаз” деген ұлағатты атауды естігенде, күні бүгінге дейін өзімді шәкірттей сезінемін.

Серке Қожамқұлов

25 қазан– еліміз үшін рухы биік, айрықша күн. Оқу ордамызда Ұлттық мереке Республика күніне орай салтанатты жиын өтті. Концерттік бағдарламаны тамашалауға студенттер, басшылық құрам, жоғары оқу орнының тыныс тіршілігіне ат салысып жүрген барлық ұжым жиналды.

Мерекелік шараның шымылдығын ашқан Басқарма Төрағасы-Ректор Ербол Исақаев әріптестерге құттықтау лебізін білдірді: «Құрметті жастар,аға буын өкілдері егеменді Қазақстанды дамытуға қадам жасаған маңызды күнмен құттықтағым келеді. Осы жылдар ішінде еліміз тұрақтылықтың символына айналды. Бұл ұлы мереке - тәуелсіздігімізді қорғаудың, ұлттық бірлікті нығайтудың және Отанымыздың игілігі үшін жоғары жауапкершілікпен қызмет жасаудың үлгісі деп білемін».

Халқымыздың рухын көтеріп, бірлігімізді нығайтатын айшықты мереке қарсаңында, еліміздегі ғылым, жоғары білім саласында кәсіби біліктілік танытқан оқытушыларды, оқу ордамыздың дамуына елеулі үлес қосып жүрген қызметкерлерді марапаттау рәсімі өтті. ҚР «Құрмет» орденімен «Қазақ тілі мен әдебиеті» кафедрасының профессоры Жанар Таласпаева марапатталды.

ҚР ҒЖБ министрлігінің «Ғылымды дамытуға сіңірген еңбегі үшін» төсбелгілерімен Стратегия және даму департаментінің директоры Марина Погребицкая мен «Химия және химиялық технологиялар» кафедрасының аға-оқытушысы Ирина Голодоваға табысталды.

Ал ҚР Ауыл шаруашылығы министрлігінің «Еңбек ардагері» медалін алған марапат иелерінің қатарында «Азық-түлік қауіпсіздігі» кафедрасының аға-оқытушысы Виктор Сиволап және «Ауыл шаруашылығы саласының үздігі» төсбелгісін алған «Агрономия және орман шаруашылығы» кафедрасының аға-оқытушысы Мұрат Ахметов және доцент Эльмира Кантарбаева бар.

Су шаруашылығын дамытуға қосқан елеулі үлесі үшін ҚР Су ресурстары және ирригация министрлігінің наградаларын мына педагогтар алды: «Су шаруашылығының үздігі» төсбелгісі марапатына «География және экология» кафедрасының доценті Асель Бектемирова мен профессор Павел Дмитриев ие болды.

Қоршаған ортаны қорғау саласындағы белсенді және жемісті жұмысы үшін ҚР Экология және табиғи ресурстар министрлігінің «Экология саласының үздігі» төсбелгісімен «Биология» кафедрасының аға-оқытушысы Иван Зубань, «География және экология» кафедрасының аға-оқытушысы Зауре Искандирова марапатталды.

ҚР Оқу-ағарту министрлігінің «Білім беру ісінің құрметті қызметкері» төсбелгісі Сыбайлас жемқорлыққа қарсы комплаенс қызметінің басшысы Инна Джемалединоваға табысталды.

Сондай-ақ, Ғылым және жоғары білім министрлігінің «Құрмет» грамоталары мен алғыс хаттарын үш әріптестеріміз алды. Бірқатар қызметкерлер СҚО әкімінің грамоталарын, Басқарма Төрағасы – Ректордың грамоталары мен алғыс хаттарын иеленді.

Шара соңында университеттің өнерлі жастары патриоттық жанрдағы әндерді орындап, сахналық қойылым ұсынды. Бұл тамаша музыкалық туындылар көрермендердің жүрегін бірлік пен Отанға деген сүйіспеншілік рухына бөледі.

Енселі тәуелсіздігіміздің, тұғырлы егемендігіміздің айғағы ұлттық мерекеміз Республика күні құтты болсын!