Сөздәйектер галереясы
Көп білем десең, аздан бастап үйрен.
Джон Локк
Иль Еленаны құттықтаймыз!
Қозыбаев университетінің профессор-оқытушылар құрамының интеллектуалды және ғылыми әлеуеті артып келеді! «Азық-түлік қауіпсіздігі» кафедрасының аға оқытушысы Иль Елена Николаевна ветеринария ғылымдарының PhD дәрежесін алды.
Елена Николаевна Чуваш мемлекеттік аграрлық университетінде (Ресей) диссертациясын сәтті қорғады. Ол өз жұмысында жоғары өнімді сиырлардағы субклиникалық кетоз кезінде сүт сапасы мен қауіпсіздігін ветеринариялық-санитарлық бағалау бойынша зерттеу жүргізді. Өндірістік жағдайда алғаш рет ірі қара малда жемшөп қоспалары кешенін қолдану жүйесі сынақтан өткізіліп, енгізілді. Зат алмасудың органолептикалық және физика-химиялық көрсеткіштерге, сондай-ақ сүттің химиялық құрамына әсерінің өзара байланысы анықталды.
Сүт тұтынудың және оның сапасына қойылатын талаптардың артуына байланысты малдың денсаулығы мен өнімділігін сақтаудың маңыздылығы мал шаруашылығының тұрақты дамуының негізгі факторына айналуда. Жоғары өнімді сиырлар көбінесе субклиникалық кетоз сияқты метаболикалық бұзылуларға бейім болып келеді. Бұл олардың өнімділігін айтарлықтай төмендетеді және ауру қаупін арттырады. Кетоз бен сүт сапасы арасындағы байланысты анықтау арқылы емдеу стратегияларын әзірлеуге көмектеседі және сүт өнімдерінің сапасы мен қауіпсіздігін жақсартады.
Зерттеу барысында өнертабысқа Еуразиялық патент («Сүтті ірі қара малға арналған Премикс» жемшөп қоспасының құрамы және оның субклиникалық кетоздың алдын алудағы тиімділігі анықталды), сондай-ақ ҚР авторлық құқығы туралы куәлігі алынды. Диссертациялық жұмыс материалдары бойынша (Web of Science және Scopus индекстейтін басылымдарда) 16 ғылыми мақала жарияланды.
Біздің аймағымыз үшін бұл зерттеулер ерекше өзекті және мал шаруашылығы кәсіпорындарының өндірістік тиімділігі мен экономикалық тұрақтылығын арттыруға мүмкіндік береді.
Елена Николаевнаны шын жүректен құттықтаймыз! Ғылыми және білім беру бастамаларын сәтті жүзеге асыру қызметінде жаңа жетістіктер тілейміз!
14.01.2026