В Kozybayev University открыли два новых научных кабинета

Жоғары оқу орнының №6 оқу ғимаратында академик Манаш Қозыбаевтың 95 жылдығына орай және Ғылым қызметкерлері күні қарсаңында екі кабинет ашылды. Бұл бастама ҚР ҒЖБ министрлігінің гранттық қаржыландыру жобасы аясында жүзеге асырылып отыр. Аталған жоба университеттің ғылыми-зерттеу әлеуетін арттыруға және өңір тарихын терең зерделеуге бағытталған маңызды қадам болып табылады.

Алғаш болып «ХХ ғасыр басындағы Қызылжар байлары» атты тарихи кабинетінің лентасы қиылды. Жаңа тарихи кабинет ғалымдарға, оқытушыларға және білім алушыларға архивтік құжаттармен жүйелі түрде жұмыс істеуге мүмкіндік береді. Мұнда Солтүстік Қазақстан өңіріндегі байлардың әлеуметтік-экономикалық рөлі, олардың қазақ қоғамындағы орны мен ықпалы, сондай-ақ ХХ ғасырдың алғашқы ширегіндегі тарихи үдерістер жан-жақты зерттеледі.

«Бүгінгі таңда «Солтүстік Қазақстандағы байлар: қоғамдағы орны, әлеуеті және шаруашылықтарының тәркіленуі» тақырыбындағы жобамыз аясында 5 қызметкер зерттеу жұмысын жүргізуде. Жобаның мақсаты- Солтүстік Қазақстандағы бай отбасыларының тізімін анықтау, жапа шеккен отбасылардың тағдырын зерттеу. Сонымен қатар олардың қоғамдық даму үдерістеріндегі маңызды рөлін ғылыми негізде көрсету. Жастар тарихымыздың ақтаңдақ беттерін, осы өлкеден шыққан ауқатты жандардың қоғамдағы орнын архивтік деректер арқылы танып біледі», – деді жоба жетекшісі Асемгуль Темирханова.

Бұл ғылыми алаң тарихи деректерді жинақтау, сақтау және оларды ғылыми айналымға енгізу жұмыстарын жандандыруға мүмкіндік береді. Әсіресе студенттер үшін нақты архивтік материалдармен жұмыс істеу тарихи сананы қалыптастырып, зерттеушілік дағдыларды дамытуға үлкен септігін тигізеді.

Іс-шара келесі кабинеттің ашылу салтанатымен жалғасын тапты. «Шекара маңындағы өңірлердің азық-түлік қауіпсіздігі саласындағы стратегиялық зерттеулер орталығы» атты саясаттану бағыты бойынша кабинет ашылды. Жобаға Марина Онучко жетекшілік етті.

Аталған кабинет «Қазақстанның шекара маңындағы өңірлерінің азық-түлік қауіпсіздігі саласындағы мемлекеттік саясатты дамыту және шешу жолдары» тақырыбындағы гранттық жоба аясында іске асырылды.

Зерттеу кабинетінде ғалымдар, саясаттанушылар және білім алушылар талдаудан өткен материалдармен жұмыс істеуге мүмкіндік алады. Арнайы кабинет стратегиялық талдау жүргізуге, азық-түлік қауіпсіздігі саласындағы бағдарламаларды әзірлеуге, мемлекеттік органдар үшін ғылыми негізделген ұсынымдар қалыптастыруға, сондай-ақ халықаралық ынтымақтастық пен тәжірибе алмасуды дамытуға бағытталған.

Ғылыми орталықтар өңір тарихын жаңаша көзқараспен зерделеуге, сондай-ақ өңірлік өндірістік үдерістерді зерттеуге жол ашатын маңызды ғылыми алаң болмақ.