Қозыбаев университеті жаңа оқу жылында ҚР Академиялық адалдық Лигасына төрағалық етеді

Қазақстанның жетекші жоғары оқу орындарын біріктіретін Академиялық адалдық лигасының басты мақсаты — ашықтық, әділеттілік, академиялық этика және өзара сенім қағидаттарына негізделген білім беру ортасын қалыптастыру.

SDU University базасында жыл сайынғы Лига форумы өтті. Биыл ұйымның құрылғанына 8 жыл толып отыр.

Панельдік сессия аясында қазақстандық жоғары оқу орындарының жетекші сарапшылары мен басшылары өзекті цифрлық және институционалдық сын-қатерлерге арналған стратегиялық баяндамаларын ұсынды.

Шара барысында Академиялық адалдық лигасының сарапшыларын марапаттау рәсімі өтті. Академиялық этика құндылықтарын ілгерілетуге қосқан елеулі үлесі мен белсенді қызметі үшін Қозыбаев университетінің сыбайлас жемқорлыққа қарсы комплаенс-қызметінің басшысы Инна Джемалединова құрмет грамотасымен марапатталды.

Одан кейін жаңа 2026–2027 оқу жылына Лига төрағасын сайлау бойынша жалпы жиналыс өтті. Төрағалыққа екі жоғары оқу орны — Халықаралық ақпараттық технологиялар университеті мен Қозыбаев университеті үміткер болды. Университет атынан ұсынылған өтінімді Академиялық мәселелер жөніндегі Басқарма  мүшесі Айгуль Нурпеисова таныстырды.

Қорытынды дауыс беру нәтижелері бойынша жалпы жиналыс мүшелерінің басым көпшілігі (70%/30%) Қозыбаев университетін қолдады.

Бұл нәтиже академиялық қауымдастықтың университетке деген жоғары сенімін көрсетіп, оның Қазақстандағы академиялық адалдық қағидаттарын нығайту жолындағы көшбасшылық рөлін тағы бір мәрте айқындады.