Оқу ордамызда факультеттер арасында «Маусымашар-2013» КВН лигасының жарысы өткізілді. Оған оқу орны факультеттері студенттерінен құралған 11 топ қатысты. Әдеттегідей КВН десе ішкен асын жерге қоятын әзілсүйер қауым бұл жолы да залғалық толды. Көңілділер мен тапқырлар клубтарының арасында ойын көрсеткен топтардың көбі алғаш рет сахнаға шығып, өз бақтарын сынады.
Бірінші тур - сәлемдесу «СҚМУ эволюциясы», екінші тур - «Жаңалықтар» деп аталатын бөлімдерде студенттер уақыт регламенті бойынша өнер көрсетіп, жиналған жұртқа көтеріңкі көңіл күй сыйлады. Көбінесе қазіргі таңдағы өзекті тіл мәселесі мен студенттік өмірде болған оқиғалар, махаббат, ата-ана мен баланың қарым-қатынасы тақырыптары көрініс тапты. Әр факультет құрамалары өздерінің ой ұшқырлығын танытты.
Бұл сында калалық классикалық гимназиясының түлектерінің түрлі факультеттерден жиналып біріккен «Бәйтерек» командасы топ жарды. Екінші орынды тіл және әдебиет институтының «Мәссаған» командасы ұтып алды. Үшінші орынға инженерлік-техникалық факультетінің «Құрылыс kz» командасы ие болды. Осылайша, әзілдері жарасқан жастар студенттер күні қарсаңында сүйікті КВН ойындарында жүздесіп қайтты.