М.Қозыбаев атындағы СҚМУ қарттар күні мен халықаралық ұстаздар күнін атап өтті. Залға қуаныш иелері лық тола жиналды.
Салтанатты шараның шымылдығы «Алуа» тобының «Шашу» биімен ашылды. Одан кейін тәрбие ісі жөніндегі проректор Мүкарам Тайжанова университеттің мыңнан аса ұстаздары мен ардагерлерді бүгінгі қуаныштарымен құттықтап, жылы лебізін білдірді.
— Мерекелеріңіз құтты болсын! Сіздерге шын жүректен бақыт, шаттық, денсаулық тілеймін. Еңбектеріңізде жеміс, отбасыларыңызда береке болсын, — деді тәрбие ісі жөніндегі проректор Мүкарам Тайжанова
Мерекелік құттықтауынан кейін Мүкарам Тайжанова жыл сайынғы дәстүр бойынша «Үлкен алтын медальді» иелеріне табыс етті. Оған он шақты университет қызметкері мен ардагер ие болды. Соның бірі – «Көлік және машина жасау кафедрасының» аға оқытушысы Серік Ықыласұлы. Ол білім ордаға өзінің 20 жылын арнаған екен. Сондықтан бүгінгі марапаты кезінде өз қуанышын жасыра алмады.
— Бүгін осындай марапатқа ие болып отырғаныма мен ерекше қуаныштымын. Әріптестерімді мерекелерімен құттықтаймын. Біз өз арқамызда маңызды миссияны арқалап жүрміз. Осы міндетті абыроймен атқарып, Қазақстанның дамуына үлкен үлес қосуға лайық азаматтарды тәрбиелеп шығаруға бар күш-жігерімді жұмсауға дайынмын, — деді «Көлік және машина жасау» кафедрасының аға оқытушысы Серік Әбілмажінов.
Қуаныш иелеріне арнап университеттің шығармашылық ұжымы тамаша концерт ұйымдастырды. Сырттан шақырылған өнерпаздармен қатар, студенттер де ұстаздарының құрметіне ән шырқап, би биледі.