Осы аптаның басында оқу ордамызға «Қазақфильм» кино студиясының деректі фильмдер режиссері Орал Жүнісов келіп, жуықта ғана түсіріліп біткен Сәкен Жүнісов ағасы жайлы деректі фильмді таныстырды. Бұл өз кезегінде университетіміздегі әдебиетсүйерлер үшін үлкен жаңалық болды.
Сәкен Жүнісов – Солтүстік Қазақстан облысында тумасы, Қазақстанның халық жазушысы. Оның соңына қалдырған шығармалары, теңдесіз кітаптары бүгінгі ұрпақтың алтын мұрасына айналып үлгерді.
Кинорежиссердің айтуынша Сәкеннің шығармашылық өмірінен сыр шертетін бұл фильмді түсіру оңайға соқпаған. Кейбір деректердің толыққанды сақталмай жоғалып кеткендігі де аз-мұз кедергі келтірген. Фильмде негізінен Сәкеннің серілік қырларына ерекше көрсетілген. Оның әнді қалай тамаша шырқайтындығы, драмматург ретінде халық алдында беделді болғандығы фильм желісіне арқау болған. Мұндай туынды талай жылдар мен біршама маңдай терді талап еткендігін фильм авторы жасырмайды.
Осындай мұраны тамашалауға облысымыздың билік өкілдері мен қоғам қайраткерлері, оқу ордамыздың оқытушылары, студенттері жиылды. Олар фильмді аса бір ынтызарлықпен тамашалады..
Бір сағатқа созылған деректі фильмде Сәкен серінің өмірі туралы терең баяндалды. Алайда кинорежиссер Орал Жүнісов бұл жеткіліксіз, сондықтан алдағы уақытта бұдан да көлемді туынды жасау ойында бар екендігін айтты.
Байболат Құлтанов,
«Парасат»