М.Қозыбаев атындағы СҚМУ-дың профессоры Зарқын Тайшыбай қазақтың құнды кітаптарының қатарына тағы бір туындысын қосты. ХХ ғасырдың басында Петропавлда жарық көрген «Жас азамат» пен «Есіл даласы» газеттерінің тарихын жандандырған кітаптың тұсау кесері №3 оқу корпусының М.Жұмабаевқа арналған дәрісханасында өтті.
Абылайтанудың ғылыми негізін қалыптастырған Зарқын Сыздықұлы осы күнге дейін 7 монография, 4 оқу құралын жарыққа шығарып, 100-ден аса ғылыми мақала жазған. Бүгін міне солардың қатарына бір ғасыр бұрынғы тарихи газеттер туралы ескіні жаңғыртқан кітабын оқырман назарына ұсынып отыр. Еңбектің құндылығы сода, ол 1913-1919 жылғы Қазақстанның қоғамдық-саяси өмірінен, «Алашорда» үкіметінің қызметінен хабар береді.
Кітапқа арқау болған «Жас азамат» газеті қазақ даласында жарық көрген тұңғыш жастар басылымы. Оның шығуына сол кезде жасы 20-ның ар жақ, бер жағында болған Смағұл Садуақасов, Қошке Кемегеров, Мағжан Жұмабаев сынды жастар ат салысқан. Ал «Есіл даласы» - өлкемізде орысша-қазақша ақпарат таратқан алғашқы қалалық прогрессшіл газет.
Шара барысында жиналғандарға кітаптың маңызы түсіндірілді. Өңіріміздегі белді тұлғалар ой-пікірлерін білдірді.
Қазақтың алтын қорын бір кітапқа байыта түскен профессор Зарқын Сыздықұлы алдағы уақытта жарыққа шыққан туындысын Астанаға апарып, күллі елге таныстыруды мақсат етіп отыр.