Осыдан 23 жыл бұрын, яғни 1991 жылғы 16 желтоқсанда қазақ елі азаттығын алды. Содан бері дамудың даңғыл жолына түсіп, әлемдік аренада өз орнын тауып үлгерді. Бұл қазақстандықтардың ең құнды және ұлы мейрамы. Сондықтан жыл сайын ел болып дүбірлеп тойлайтынымыз әмбеге аян. М.Қозыбаев атындағы СҚМУ киелі мерекені биыл ерекше атап өтті.
Тәуелсіздікке тәу етіп келгендердің қатары қалың болды. Студенттер, оқытушылар, университеттің басқа да қызметкерлері мерекелік көңіл күймен акт залды лық толтырды. Ең алдымен ортаға егемендігіміздің ең басты нышандарының бірі көк туымыз енгізілді. Сондан соң ән ұранның асқақ үні жүректерге әуеледі.
Жиналғандарды университет ректоры Оңдасын Әшімов ел тарихындағы маңызды мерекемен құттықтады. Өз сөзінде ол Қазақстанның қазіргі даму жағдайына тоқталып, оқу ордамыздың болашақ жоспарлары туралы баяндама оқып берді.
- Тәуелсіздік деген сөздің ерекше мағынасы бар. Себебі шаңырағында бейбітшілік орнаған мемлекеттің жастары шексіз бақытты. Сіздердің әрбір күндеріңіз сәттілік пен бақытта өтуі тиіс. Тәуелсіздік ұғымы жастар үшін ең ыстық әрі қасиетті. Барша қауымды шын жүректен тәуелсіздік күнімен құттықтаймын, - деді өз сөзінде ректор.
М.Қозыбаев атындағы СҚМУ егемен елмен бірге тұрақты дамып келеді. Осы уақыттың ішінде талай студенттер түлеп ұшып, қазіргі таңда Отан үшін сүбелі еңбек етіп жатыр. Бұл жерде әрине білікті ұстаздардың еңбегі зор екенін атап өткен жөн. Мұнда жүзден астам білікті оқытушылар бес мыңдай студенттерге сабақ беріп, болашақ мамандарды даярлайды. Бүгінгі салтанатты іс-шарада солардың оннан астамы үлкен алтын медальге ие болды. Мұндай құрмет тек ұзақ жылдардан бері оқу ордамызда қызмет етіп, ұрпақ тәрбиелеу ісіне мол еңбек сіңірген адамдарға ғана көрсетіледі.
Жалпы СҚМУ - өңіріміздегі жоғары білім беретін жалғыз оқу ордасы. Мұнда еліміздің түпкір-түпкірінен келіп студенттер білім алады. Болашақ мамандарды даярлау үшін барлық жағдай жасалған. Жыл сайын оқу орнының материалдық-техникалық базасы, білім саласындағы жеке жетістіктері, мықты оқытушылар құрамы мен дарынды студенттері қалыптасып, дамып келеді. Университет басшылығы 50-ден астам шетелдік ЖОО-лар және ұйымдармен қарым-қатынас орнатып үлгерді. Алда атқарылатын жұмыстар әлі қаншама. Осының барлығы тұғырлы тәуелсіздіктің арқасы дейді мерекеге жиналғндар.
Мерекелік жиында үлкен алтын медальдан бөлек, 40-тан астам университет қызметкері грамота және алғыс хатқа ие болды. Салтанатты шара аяқталғаннан кейін көрерменге оқу ордамыздың шығармашылық ұжымы әзірлеген мерекелік концерт ұсынылды. Онда студенттер егемендікті жырлап, патриоттық әндерді шырқап, әсем қыздар би билеп берді.
