Инженерлік-техникалық факультет "Энергияны сақтаудың өзекті мәселелері және Қазақстан Республикасы ғылымы мен білім берудегі жаңа технологиялар" тақырыбында халықаралық ғылыми-тәжірибелік конференция өткізді. Конференция бағдарламасы пленарлық мәжіліс пен секциялар бойынша жұмыстардан тұрды.
СҚМУ ректоры Оңдасын Әшімов іс-шараны аша отыра энергияны тиімді сақтау мәселесі Қазақстан дамуының басым бағыттарының бірі болып табылатынын атап өтті. Бүгінгі таңның өзекті мәселесі энергияны сақтау және энергетикалық-экологиялық дағдарыс мәселелерін шешу болып табылады. Еліміздің ғалымдары жел мен күн энергиясын пайдалану бойынша күрделі жобалар жасауда. Ғылыми зерттеулерге ғалымдармен қатар Қазақстан Республикасы университеттерінің докторанттары, магистранттары мен студенттері де белсенді түрде қатысуда. Олардың көптеген жұмыстары республикалық сайыстарға қатыстырылуда, патенттік әзірлемелерде іске асырылуда.
Конференция жұмысына Омбы мемлекеттік техникалық университетінің профессоры, "Металл кесуші станоктар мен құралдар" кафедрасының меңгерушісі Андрей Попов қатысты. Ол машина жасаудың замануи технологияларын енгізу тәжірибесімен бөлісті.
Конференция факультетте жүргізілген жұмыстар нәтижесінде ұйымдастырылды. Әрбір кафедрада студенттердің ғылыми қоғамы жұмыс істейді. Студенттер факультеттің бай материалдық-техникалық базасын қолдана отырып, зерттеулер жүргізуде. Конференцияның екінші бөлімі ғылыми зерттеулер жүргізілетін зертханаларда өтті.
