«Жаратылыстану және ауыл шаруашылық ғылымдары саласындағы ғылым мен білімнің өзекті мәселелері» атты ІІІ халықаралық ғылыми-тәжірибелік конференциясы өтті.
Жиын ғұлама ғалым, КСРО мемлекеттік сыйлығының лауреаты, жазушы және публицист, дарынды аудармашы, техника ғылымдарының докторы, профессор, академик Евней Арыстанұлының 90 жылдығына арналды. Конференцияны университетіміздің ректоры Оңдасын Әшімов ашып, Евней Бөкетов жайында тарихи деректерге қысқаша тоқталды.
Бас қосуға облыс әкімінің орынбасары Анархан Дүйсенова, Евней Бөкетовтың немере қарындасы Нұрсұлу Бөкетова да қатысты. Нұрсұлу Ыбырайқызы ағасы жайында көп мағлұмат берді. Евней Арыстанұлы Бөкетовтің есімі дүйім Алаш жұртына ғана емес, әлемге танымал. Ол соңынан өшпес мұра қалдырды. 242 ғылыми жұмысы пен оның монографиялары талай ғалым үшін шамшырақ болуда. Химия, металлургия саласында оның ашқан жаңалығы әлі күнге кәсіпорындарда қолданылып келеді. Ал, ғалымның әдеби шығармалары Қазақстанның ұлттық алтын қорына енді.
Сөйтіп, пленарлық отырыс секциялар бойынша жалғасты. Барлығының өз атаулары бар. Бірі – «Агроөнеркәсіптік кешенді дамытудағы ғылым жетістікртері мен келешегін» сөз етсе, енді бірі, экология-географиялық зерттеулер сынды мәселелер жайында әңгіме қозғады. Барлығы 6 секция жұмыс жасады.
