Еліміздің солтүстігіндегі ірі жоғары оқу орны әуелден-ақ жоғары білімнің беткеұстар ордасы, зиялы қауым ортасы саналған. 75 жылдық тарихы бар іргелі оқу орны осынау биік дәрежесін әлі күнге дейін бір төмендеткен емес. Мерейтой күні барша жұртшылық оқу орнының жетістіктерін паш етті. Жиынның шымылдығын ашқан университет басшысы Оңдасын Әшімов барша қауымды торқалы тоймен құттықтап, білім ордасының қол жеткізген белестерін бір тізіп өтті.
Салтанатты жиынға қатысқан облыс әкімі Серік Біләлов университеттің дамуына сүбелі үлес қосқан бір топ қызметкерлерді облыс әкімінің құрмет грамоталары мен алғыстарымен марапаттады. Оқу орны басшысы облыс әкіміне университеттің дамуына қосқан үлесі үшін үлкен алтын медалін табыс етті. Кейін жиынға арнайы шақырылған құрметті меймандарды қошеметтеп, таныстырып өтті. Қонақтардың ішінде көршілес ресей елінің шекаралас аймақтар мен германиядан келген жоғары мектеп өкілдері де болды.
ҚР Парламент Сенатының депутаты Анатолий Башмаков ҚР Парламенті Сенатының төрағасы Қайрат Мәмидің құттықтау хатын жеткізіп, жерлестерін мерейлі белесімен құттықтады. «Парасат» Ұлттық ғылыми-технологиялық холдингі» АҚ-ның Басқарма Төрағасы Нұралы Бектұрғанов ҚР білім және ғылым министрі Бақытжан Жұмағұловтың сәлемдеме хатын оқып, ғылымға қосқан үлестері үшін университеттің бірқатар қызметкерлерін министрліктің атынан төсбелгілер мен грамоталарды табыс етті. Мерекелік жиынға жан-жақтан жиылған қонақтар кәде сыйларын табыстап жатты. Көршілес Ресей елінің шекаралас аймақтарынан келген әріптес қонақтар білім саласындағы екі ел арасындағы мызғымас достықтың маңыздылығын ерекше атап өтті. Ресей жаратылыстану ғылымдарының академиясының вице-президенті Анатолий Спицын облыс әкімі мен университет басшысына ғылым мен экономиканы дамуына қосқан үлестері үшін арнайы құрмет белгілерін тапсырды. Мерейтойға ортақтасып келген жерлес ақын Кәкімбек Салықов оқу ордасына жыр шумақтарын арнады.
Бұл күні ұйымдастырылған «Ғылым, білім және өндірістің интеграциясы» атты халықаралық көрмеде университет ғалымдарының еліміздің индустриалдық инновациялық дамуы бағытындағы ғылыми жобалары көрініс тапты. Бүгінгі таңда университет ғылыми зерттеу институты болуға лайық екенін ғылымдағы алғабасушылықтан байқалады. Жоғары оқу орнының ғылыми зерттеу жұмыстарына жылына 120 млн теңге бөлінуде. Осы жобалар бүгінгі таңда аса қажетті салаларды қамтиды және жоғары сұранысқа ие болып отыр.
Салтанатты жиын университеттің шығармашылық ұжымдары дайындаған мерекелік концертпен жалғасты.
М. Қозыбаев атындағы СҚМУ-дың 75 жылдығына арналған "Парасат" телестудиясының фильмы