Университетіміз әлемдік стандарттарға сәйкес білім сапасын қамтамасыз ету, сондай-ақ, оның тартымдылығы ман бәсекеге қабілеттілігін арттыру мақсатында академиялық ұтқырлық бойынша бағдарламаны белсенді енгізіп келе жатқанына бес жыл болды. Омбы мемлекеттік педагогикалық университетінің делегациясы университетке әрі қарай ынтымақтасу және осы бағдарламаны жүзеге асыру мүмкіндіктерін талқылау үшін жұмыс сапарымен келді.
Омбы мемлекеттік педагогикалық университеті көпдеңгейлі білім беру орталығы болып табылады. Оқу ісі жөніндегі проректор Геннадий Косяков мырзаның айтуынша ОмМПУ-да бала болып келіп, ғылым докторы болып шығуға болады. Университет жанында қосымша білім беру орталығы, лицей, колледж ашылған. ЖОО Қазақстанның студенттері үшін кең көлемде магистратура бағдарламаларын, бакалавриат студенттері үшін тағылымдама ұсынып отыр. Бұл үшін барлық қажетті академиялық және материалдық жағдайлар жасалған.
Омбы мемлекеттік педагогикалық университетімен ынтымақтасу туралы келісімшартқа қол 2012 жылы қойылған. Ресей ЖОО-сында жоғары білім берудің үш деңгейі бойынша тағылымдамадан өтуге болады: бакалавриат, магистратура, аспирантура. Сонымен қатар Омбы мемлекеттік педагогикалық университеті қосдипломды білім беру бағдарламаларын ұсынып отыр. Оқу 5 жылға созылады және екі тең бағалы профильден тұрады. Бұл шағын комплектілі мектептерді кадрлармен қамтамасыз етуге көмектеседі. Бұл біздің еліміз үшін өте маңызды.
2016 жылы Қазақстан Республикасы Консулдығының қолдауымен «Родной язык и родная литература»төртжылдық бағдарламасы әзірленеді деп жоспарлануда. Омбы облысында көптеген қазақ жұрты тұратындықтан бұл бағдарламаға қазақ тілі бойынша элективті курстар енгізіледі.
