Өңірімізге жұмыс сапарымен келген Қазақстанның Орталық ардагерлер кеңесінің төрағасы Өмірзақ Озғанбаев бастаған бір топ делегат университетімізге де ат басын тіреді. Жоғарғы оқу орнымыздың, аудан, қала, облыстық аға буын өкілдерімен кездесіп бірқатар мәселелерді дөңгелек үстел барысында талқылады.
Ең алдымен аға буын өкілдері «Үлкендер жолы-ұлылық, ұрпағы жүрер ұғынып» атты көрменің жұмысымен танысты. Содан соң, дөңгелек үстелде бас қосты. Ардагерлер ұйымдарының жұмысын жетілдіру, орталық президиумының мүшелерінің ат салысуымен жастардың патриоттық сезімдерін тереңдету дөңгелек үстелдің тақырыбына арқау болды.
Қазақстанда 10 мыңнан астам бастауыш ардагерлер ұйымы бар екен. Олар әр дайым еліміздің дамуына өз үлестерін қосып жүр.
ҚР орталық ардагерлер кеңесінің төрағасы университеіміздің ардагерлер ұйымының жұмысына оң бағасын берді. Біздің университетіміздегі бастауыш ардагерлер ұйымында бүгінгі күні 400-ден астам аға буын өкілдері бар. Оның 90-ға жуығы университетімізде педагогикалық еңбек жолын жалғастырып келеді дейді жоғарғы оқу орнымыздың тәрбие жұмысы жөніндегі проректоры Мүкәрам Тайжанова.