Көрнекті ақын Кәкімбек Салықов 2 жыл бұрын дүниеден озды. Конференция басталмас бұрын тұлғаның өмірбаяны мен еңбек жолы туралы шағын бейнефильм көрсетілді. Содан соң мемлекет және қоғам қайраткері, ақын, қазақ поэзиясының жезкиігін еске алуға арналған конференцияны университетіміздің ректоры Оңдасын Әшімов ашып, көрнекті тұлға ның өмірі мен шығармашылығының зерттелмеген жаңаша қыр-сырлары осы отырыста ашылып, айтылмаған ой-түйіндердің куәсі боламыз деді.
Конференцияда сөз алған облыс әкімі Ерік Сұлтанов талай саңылақтарды дүниеге әкелген ерке Есіл өңірінің киелі топырағында туған Кәкімбек Салықов ел көшін алға сүйреген өр тұлғалы азаматтардың бірі болғанын тілге тиек етті.
Жиынға елімізге белгілі ақын-жазушылар, ғалымдар, университетіміздің оқытушылары мен студенттері және Кәкімбек ағамыздың жары мен балалары қатысты.
Кәкімбек Салықов 800-ден астам өлеңді мұраға қалдырды. Тундылары орыс, қырғыз, өзбек тілдеріне аударылған. Бұған қоса жерлесіміз орыс классик прозаиктерінің шығармаларын қазақ тіліне тәржімалаумен айналысыпты. 60-тан астам композитор К.Салықовтың өлеңдерінің мәтініне 500-дей ән жазған.
Халқы барда Кәкімбек атамыз туған елімен бірге жасай бермек.
