Өткен аптада ҚР Парламенті Мәжілісінің депутаттары Бақытжан Ертаев пен Талғат Ерғалиев Манаш Қозыбаев атындағы СҚМУ студенттерімен кездесті.
Мәжіліс депутаттары алдымен университеттің әскери кафедрасының материалдық-техникалық жарақтандырылуымен танысты. Бүгінде онда үш әскери мамандық бойынша 250 студент білім алып жатыр. Кафедрада студенттерге арнайы әскери машинаны жүргізуді үйрететін техника бар. Бірақ ол қолдан жиналған. Осыған назар аударған Бақытжан Ертаев қорғаныс істері жөніндегі департамент бастығы Амангелді Дүйсекинге кафедраны әскери қондырғылармен жарақтандыруға қолғабыс етуді тапсырды. Мәжіліс депутаттары бірнеше сабақтарға қатысып, студенттерге отансүйгіштік жайында әңгімелеп берді.
Халық қаһарманы, генерал-лейтенант Бақытжан Ертаев студенттермен «Калашников» автоматын бұзудан жарысып та көрді. Бүгінгі депутат әскери өмірге 43 жылын арнаған. Ауған соғысында ерлік көрсетіп, «Халық қаһарманы» құрмет атағымен, «Отан», «Қызыл Жұлдыз», II дәрежелі «Данқ» және басқа да жауынгерлік ордендермен және медальдармен марапатталған.
Бақытжан Ертаев пен Талғат Ерғалиев универститетегі мұражайға да бас сұқты. Мұндағы 8 залға 3 мыңнан астам жәдігер қойылған. Сондай-ақ депуттар осы күні обсерватория мен жүзу бассейнінде де болды.
— Мен ырзамын, қуаныштымын. Осы жерде оқып жатқан студенттер бақытты. Бассейн, обсервтория, музей бар. Мұражай керемет, тарихсыз халық болмайды, — деді Бақытжан Ертаев.
